412

مشکل فیصلے کیتے، لوکیں غصے وچ نیں، عمران

ڈاووس
وزیراعظم عمران خان نے ورلڈ اکنامک فورم وچ تقریر کردیاں آکھیا کہ پاکستان دے لوکیں اوہناں نوں چالیہ 40 ورھیان توں جانندے نیں، تے اوہناں دیاں نظراں ساہمنے نیں، ایہہ پہلی واری ہویا کہ لنگھے ڈیڑھ ورھے دوران لوکاں دا رویہ وکھرا جیا اے، جدوں دا اقتدار سانبھیا اوس مگروں مشکل فیصلے کرنے پئے جیہدے کارن لوکاں دا رویہ سخت اے۔
عمران خان آکھیا ایہہ پک کرلیا اے پئی پاکستان ہن کسے دوجے دی جنگ وچ نئیں رلنا، ہن اساں نرا امن دے چاہیوان ملکاں نال سانجھ نبھانی اے۔ سعودی عرب، ایران تے امریکا وچکار کھچ گھٹ کران وچ اپنا کردار نبھا رہے آں۔
پاکستان وچ ہن کوئی دہشت گردی نئیں ہورہی ہن مسئلہ نرا فغانستان دے امن دا اے، پاکستان امن لئی سہولت کار دا کردار ادا کررہے آں۔ عمران خان کہندے نیں افغانستان وچ امن لئی طالبان تے افغان سرکار نوں مل بیٹھنا ہووے گا۔ تاں ای مسئلے دا کوئی حل لبھے گا۔
اوہناں آکھیا کہ امریکی صدر ٹرمپ نوں کہیا اے پئی امریکا تے ایران وچکار جنگ نئیں ہونی چاہیدی اے، جنگ نال ہر پاسے تباہی آجاوے گی، ڈونلڈٹرمپ نے میری گل دا کوئی جواب نئیں دتا، کسے جھگڑے دا فوجی حل نئیں ہوندا، ایہہ گل ٹرمپ وی جانندے نیں، مینوں نئیں لگدا امریکا کوئی پاگل پنا وکھائے گا۔

اپنی رائے دا اظہار کرو