انٹرنیشنل ٹریڈ یونین کنفیڈریشن نے آل پاکستان ٹریڈ یونین کانگرس تے پاکستان ورکرز فیڈریشن ولوں وزیراعظم عمران خان تے وزیراعلیٰ عثمان بزدار توں منگ کیتی اے کہ 17 فروری 2020 نوں فیروز والہ وچ راوی آٹو فیکٹری وچ مالکاں نے چھٹی دا دیہاڑ ہوون باوجود مزدوراں نوں کم کرن لئی سدیا، جیہدے اتے اوہناں فیکٹری وچ آکے احتجاج کیتا۔ جدوں مزدور روٹی کھان لئی گئے تاں مالک نے اپنے محافظاں نال رل کے مزدوراں اتے پہلاں ہوائی فائر کیتے فیر انھے واہ گولیاں چلادتیاں جیہدے کارن اک جوان رضوان ماریا گیا تے چار ڈاھڈے پھٹڑ ہوئے جنہاں نوں میوہسپتال لہور لے جایا گیا، ایس ظالمانہ وقوعے دا پرچہ تھانہ فیروز والے وچ کرایا گیا۔
مزدور حقاں لئی لڑن والی اینہاں تنظیماں نے وزیراعظم تے وزیراعلیٰ نوں دسیا کہ فیکٹری مالکاں احتجاج کرن والیاں نوں نوکریوں کڈدتا تے دوجے پاسے اوہناں خلاف کوئی قنونی کارروائی وی عمل وچ نئیں لیائی گئی۔ اوہناں عدالتی تحقیقات کرکے ذمہ داراں نوں کڑی سزا دوان دی منگ کیتی۔ اوہناں ایس گل دی منگ کیتی پئی جنہاں مزدوراں نوں کڈیا گیا اوہناں نوں مڑتوں کم اتے لایا جاوے۔
359
