بھارت چ تِن طلاقاں تے پابندی دا قنون منظور

نئی دِلی (میڈیا رپورٹ) بھارت چ لوک سبھا (تَھلڑے ایوان) مگروں راجیا سبھا (اُتلے ایوان) نے وی اِکو وار تِن طلاقاں نوں سزا جوگ جرم قرار دین دا بل اکثیرت نال منظور کر لیا۔ ہندوستان ٹائمز دی رپورٹ موجب راجیا سبھا اندر بل دے حق چ 84 ووٹ پائے گئے۔ بھارتی وزیر اعظم نریندر مودی نے مسلم ویمن (پروٹیکشن رائٹس آن میریج) بل 2017ء منظور ہون تے خوشی دا اظہار کر دیاں آپنے ٹوئٹ چ آکھیا کہ پچھلی پُرانی روائتاں آخیر تریخ دے کوڑے دان تائیں روک دِتیاں گئیاں نیں۔ مودی ہوراں آکھیا کہ پارلیمنٹ نے اِک وار تِن طلاقاں رَد کر چَھڈیاں۔ فرانسیسی خبر ایجنسی اے ایف پی نے آپنی رپورٹ چ دَسیائے کہ بھارتی سپریم کورٹ دے ججاں دے اِک پینل نے آپنے فیصلے چ آکھیا سی کہ تِن طلاقاں دینا مذہب چ لازمی نہیں تے اخلاقی حوالے نال وی ایہہ آئین دی خلاف ورزی اے۔ تِن طلاقاں دا ظلم بُھگتن آلیاں زنانیاں نے ایس کَم تے اُکا پابندی لاؤن لئی سپریم کورٹ چ پٹیشن دائر کر رکھی سی۔اوہناں دا کہنا سی کہ ‘مسلم پرسنل لاء ایپلی کیشن ایکٹ’ جیہڑا شریعت قنون ہیٹھ تے تِن طلاقاں بارے ہے، دا غلط وَرتن کیتا جا رہیائے۔