لہور (سجن رپورٹ) ایران وچ فلیش ہڑھ لیاون والا تباہ کن بدل ہن بلوچستان وچ وڑ گیا اے۔ ہوا دے گھٹ دباء دے ایس سسٹم دے آون نال کراچی وچ ہنیری تے طوفان آ گیا اے۔ ہم تائیں ملن والیاں اطلاعواں دے مطابق اتوار دی رات توں ہن تائیں طوفانی ہواواں نال 3 بندے فوت ہو گئے تے دس پھٹڑ ہو چکے نیں۔ پیپلز چورنگی دے لاگے اک رکھ ہنیری نال ڈھے گیا تے اک بندا اوہدے تھلے آ کے تھاں تے ہی مر گیا۔ ٹیپو سلطان روڈ تے اک سکول وچ کمرے دی چھت ہنیری دا بھار نہیں جھل سکی، چھت ڈھین نال چھ بال پھٹڑ ہو گئے۔ فش ہاربر دے علاقے وچ اک مسیت دی چھت ڈگن نال پیش امام پھٹڑ ہو گیا۔ لانڈھی نمبر 3 وچ اک گھر دی کندھ ڈھے گئی جیہدے تھلے آ کے گھر دے 3 جی پھٹڑ ہو گئے۔ سرجانی ٹاون نمبر ست وچ گھر دی چھت ڈگن نال دو بندے زخمی ہوئے۔
موسم دی پیش گوئی کرن والے محکمے میٹلرجیکل ڈیپارٹمنٹ نے دسیا اے بئی اج کراچی وچ طوفانی بارش ہوون دا امکان اے۔ جدوں کہ بلوچستان دے مکران، قلات، کوئٹہ تے زوب دے علاقیاں دے نال ڈیرہ غازی خان دے برساتی نالیاں وچ وی فلیش ہڑھ آون دا خطرہ اے۔ ایہناں علاقیاں وچ لوک دو دن گھر ہی رہون تے چنگا اے۔ اج تے کل بلوچستان وچ آئے طوفان دا اثر سندھ وچ۔سکھر، لاڑکانہ، بینظیر آباد تے ہور کئی علاقیاں تائیں وی پہنچے گا، کدھرے ہنیری جھلے گی تے کدھرے مینہہ وسے گا۔
370
