378

اوآئی سی اجلاس، اسلاموفوبیا اتے تشویش

اسلامی ملکاں دی تنظیم (او آئی سی) دے سربراہ اجلاس مگروں اک سانجھے اعلامیے وچ امریکی سفارت خانے نوں یروشلم منتقل کرن تے گولان دی پہاڑیاں اتے اسرائیل دی آپ مختاری تسلیم کرن دے امریکی فیصلے دی مذمت کیتی گئی ۔ مکہ اجلاس دے اعلامیے وچ فلسطین سنے اسلامی دنیا نوں پیش مسلیاں اتے گل بات ہوئی، ایہدے وچ ‘اسلامو فوبیا’ یعنی اسلام بارے منفی پراپیگنڈا تے خوف پھیلان ورگے معاملے وی شامل سن۔اسلاموفوبیا نوں ایس دور دی نسل پرستی تے مذہبی تعصب قرار دتا گیا، تے او آئی سی تشویش ظاہر کیتی کہ دنیا دے کئی ملکاں وچ اسلاموفویبا ودھ رہیا اے۔ ایہدا ثبوت مسلماناں خلاف تشدد دے ودھدے وقوعے نیں۔

مسئلہ فلسطین اتے او آئی سی دے سانجھے اعلامیے وچ اسرائیل دے اوہناں کماں دی مذمت کیتی گئی جنہاں دا مقصد مقبوضہ فلسطینی علاقیاں وچ زمینی حقائق تبدیل کرنا تے دو ریاستی حل نوں مشکل بنانا اے۔سعودی عرب دے بادشاہ شاہ سلمان بن عبدالعزیز نے مسلمان ملکاں دے سربراہاں نوں آکھیا کہ مسئلہ فلسطین داحل او آئی سی دے بنیادی مقصد اں وچ شامل اے۔ تے جد تیک فلسطینی بھائیاں نوں اوہناں دے جائز حق نئیں مل جاندے تے او آئی سی دی ساری توجہ ایس اتے رہووے گی۔

اپنی رائے دا اظہار کرو