393

امریکا بی ایل اے نوں دہشت گرد تنظیم قرار دے دِتا

واشنگٹن (میڈیا رپورٹ) امریکا نے بلوچ لبریشن آرمی (بی ایل اے) دا ناں دہشت گرد تنظیماں دی فہرست وچ شامل کر لیائے۔ غیر ملکی خبر رساں اداریاں موجب امریکا نے بلوچ لبریشن آرمی نوں عالمی دہشت گرد تنظیم قرار دین دے نال جند اللہ دا ناں وی امریکی فہرست وچ رَلایا اے۔ فہرست چ ناں آون پاروں دوویں تنظیماں امریکا وچ دہشت گرد سمجھیاں جاون گیاں۔ امریکی محکمہ خارجہ موجب دوہاں تنظیماں دے اثاثے وی منجمد کیتیے جاسن تے نالے امریکی شہریاں دے ایہناں تنظیماں نال کسے قسم دے لین دین تے وی پابندی ہووے گی۔ امریکی محکمہ خارجہ دا کہنا اے کہ بی ایل اے دہشت گرد کارروائیاں وچ ملوث اے، ایہہ ہتھیاربند علیحدگی پسند گروپ اے جیہڑا سیکیورٹی فورسز تے عام لوکاں نوں نشانہ بناندا اے تے ایس دَھڑے ولوں لنگھے ورھے پاکستان اندر کئی دہشت گرد حملے کیتے گئے نیں۔ امریکی رپورٹ موجب بی ایل اے نے اگست 2018ء چ بلوچستان اندر چینی انجینئرز نوں نشانہ بنایا، نومبر 2018ء چ کراچی چ چینی قونصلیٹ اُتے حملہ کیتا تے مئی 2019ء چ گوادر اندر اِک ہوٹل اَپر حملہ کیتا۔ چیتے رہوے کہ پاکستان تے برطانیہ پہلاں ہی بی ایل اے نوں دہشت گرد تنظیم قرار دے چکے ہین تے پاکستانی سرکار ایس توں پہلے امریکا کولوں بی ایل اے نوں دہشت گرد تنظیم قرار دین دی منگ کر دی رہی اے۔

اپنی رائے دا اظہار کرو