اسلام آباد: سپریم کورٹ نے آرمی چیف دی مدتِ ملازمت وچ شرط رکھ کے 6 ماہ دا وادھا کردتا اے۔
سپریم کورٹ اپنے فیصلے وچ آکھیا آرمی چیف دی موجودہ تقرری 6 مہینے لئی ہووے گی، وفاقی حکومت یقین دوایا اے کہ ایس عرصے وچ قانون بنالیاجاوے گا، آرمی چیف دی ملازمت دی مدت تے سہولتاں بارے قنوں تیار کیتا جاوے گا۔
عدالت اپنے مختصر فیصلے وچ کہیا کہ پوری تسلی کردیاں ایہہ معاملہ پارلیمنٹ اتے چھڈ رہے آں، پارلیمنٹ آئین دے آرٹیکل 243 تحت آرمی چیف دی تقرری متعلق قانون سازی کرے، آرمی چیف جنرل قمر جاوید باجوہ نئی قانون سازی تیک اپنے عہدے اتے کم کردے رہن گے،اج عدالت پیش کیتا گیا نوٹی فکیشن 6 مہینیاں لئی ہووے گا۔
چیف جسٹس آصف سعید کھوسہ دی اگوائی ہیٹھ جسٹس منصور علی شاہ تے جسٹس مظہر میاں خیل دے بینچ سنوائی کیتی۔
اٹارنی جنرل پاکستان انور منصور خان تے آرمی چیف دے وکیل فروغ نسیم عدالت وچ پیش ہوئے۔
عدالت نے سنوائی شروع کردیاں، سابق آرمی چیف جنرل (ر) اشفاق پرویز کیانی دی مدت ملازمت ودھان دا نوٹی فکیشن منگ لیا۔
چیف جسٹس نے اٹارنی جنرل نوں آکھیا کہ جنرل (ر) راحیل شریف دی ریٹائرمنٹ دے کاغذ وی پیش کرو۔ اوہ جد ریٹائر ہوئے تاں اوس نوٹیفیکیشن دے کیہ لفظ سن اوہ پیش کیتے جاون۔
عدالت دیکھنا چاہندی اے جنرل (ر)اشفاق پرویز کیانی نوں ریٹائرمنٹ مگروں کنی پینشن ملی۔
چیف جسٹس پاکستان ریمارکس دتے سانوں دسیا گیا اے کہ جنرل کدی ریٹائر نئیں ہوندے، جے جنرل ریٹائر نئیں ہوندے تاں پینشن وی نہیں ہوندی۔ سنوائی وقفے مگروں فیر شروع ہوئی تاں اٹارنی جنرل دا مؤقف سی کہ آرٹیکل 243 دے تحت آرمی چیف دی دوبارہ تعیناتی کردتی گئی اے، ایہدے اتے چیف جسٹس سوال کیتا کہ اج ہون والی تعیناتی پہلاں توں کیویں وکھری اے؟
اٹارنی جنرل دا جواب سی کہ نویں بھرتی 243 (1) بی تحت کیتی گئی اے، ایس تے جسٹس آصف سعید کھوسہ ریمارکس دتےکہ تہانوں ساڈی تسلی کرنا ہووے گی، کہ ہن والی تعیناتی کیویں درست اے؟ سمری وچ تاں عدالتی کارروائی دا وی ذکر کیتا گیا اے، آپ بوجھ خود اٹھاو ساڈے مودھیاں نوں کیوں ورت رہے او،اپنا کم آپ کرو،سانوں وچ کیوں لیاندے او، عدالت دا نام استعمال کیتا گیا تاں جے غلط وی نا کہہ سکیئے۔
چیف جسٹس پاکستان ہدایت کیتی کہ سمری وچوں عدالت دا نام کڈھ لیا جاوے۔
جسٹس آصف سعید کھوسہ آکھیا تعیناتی قانونی اے یا نہیں اوہ جائزہ لین گے، اج توں تعیناتی 28 نومبر دی کردتی،تعنیاتی تے توسیع متعلق آرمی ریگولیشنزدی کتاب نوں چھپا کے کیوں رکھیا گیا، ایس کتاب اتے لکھیا اے کوئی غیرمتعلقہ شخص پڑھ نہیں سکدا، کیوں تساں ایس کتاب نوں سینے نال لاکے رکھیا ہویا سی، بھارت تے دوجے ملکاں وچ آرمی چیف دی تعیناتی تے مدت واضح اے، ہن عدالت وچ معاملہ پہلی بار آگیا اے تاں واضح ہونا چاہیدا اے۔
اٹارنی جنرل نے مؤقف اپنایا کہ جے مدت مقرر نا کریئے تاں دوجے حکم تیک حکم ثانی آرمی چیف تعینات ہووے گا، مدت مکمل ہون مگروں جنرل ریٹائر ہوجاندا اے۔
چیف جسٹس پاکستان نے ریمارکس دتے کہ اساں آئین تے قانون نوں کیہ دیکھیا ساڈے خلاف پراپیگنڈہ شروع ہوگیا، کہہ دتا گیا کہ ایہہ تینوں جج سی آئی اے دے ایجنٹ نیں، الزام لگیا کہ اسیں بھارت دے آکھن اے کم کررہے آں، ایس نوں ففتھ جنریشن وار بنادتا گیا، سانوں پچھنا پے گیا، آخر ففتھ جنریشن وار ہوندی کیہ اے، کہیا گیا کہ سپریم کورٹ دے ججز نوں بھارتی چینلز اتے چلایا جارہیا ہے، آئینی اداریاں بارے انج نئیں ہونا چاہیدا۔
چیف جسٹس پاکستان نے انتہائی اہم ریمارکس دتے کہ آئینی اداریاں بارے ایسراں نہیں کرنا چاہیدا، تسیں 3 سال لئی توسیع دے رہے او، کل کوئی قابل جنرل آئے گا تاں کیہ اوس نوں 30 سال دی توسیع دیو گے؟
جسٹس آصف سعید کھوسہ نے آکھیا کہ آرمی ایکٹ وچ اولہا اے، تسیں رولز وچ ترمیم کردے رہے او، فیر اسیں ایڈوائزری کردار لکھ دتا۔
428
