582

لہور دی تریخ ،کنہیا لال، قسط 7

لہور اتے اٹھواں حملہ
لہور شہر اتے ایہہ صدمہ سلطان مبارک شاہ بن خضر خان دے دور وچ گزریا۔ جنہوں دوجے صدمیاں توں بُرا خیال کیتا جاندا اے۔ ہویا ایہہ کہ جدوں امیر تیمور سیکھا گھکڑ نوں قتل کرن مگروں ہندوستان توں ٹرگیا تے ہندوستان دی سلطنت خضر خان دے حوالے کرگیا۔ خضر خان دی حیاتی دوران گھکڑاں نوں فیر حملے دی جرات نہ ہوئی۔ مگر 828 ہجری وچ خضرخان مرگیا تے مبارک شاہ دلی دے تخت اتے بیٹھ گیا۔ ملک وچ فیر توں فساد پھٹ پئے۔ سیکھا دے بھائی جسرت نے وی پنجاب وچ غدر مچادتا، اوہ ڈھیر ساری فوج لے کے لہور اتے چڑھ دوڑیا۔ اوس نوں شہریاں نال دشمنی سی پئی اوہناں امیر تیمور دی فوج نال رل کے اوس دے بھائی سیکھا نوں مروایا۔ اوس شہر دا گھیرا کیتا شہریاں اوس دا بہادری نال مقابلہ کیتا۔ بادشاہی ناظم نوں لڑائی وچ ہار ہوئی، تے اوہ نس گیا، شہر والے دو مہینے تیک لڑدے رہے۔ جدھے مگروں اوس شہر نوں فتح کرلیا، ہزاراں لوکاں نوں قتل کردتا، وڈی عمارتاں نوں ساڑھ کے ڈھا دتا۔ شہر اک وار فیر اجڑ گیا۔ ایہہ سبھ سنن مگروں بادشاہ نے سلطان شاہ لودی حاکم سرہند نوں فوج لے جاکے جسرت نوں پنجاب توں کڈھن دا حکم دتا۔
فوج اپڑی اوس نے سیکھا دے بھرا دی فوج نال مقابلہ کیتا، شاہی فوج ودھ سی ایس پاروں جسرت دا لشکر ایتھوں نسن اتے مجبور ہویا، لیکن ایس لمی لڑائی پاروں لہور شہر نوں تباہی تے بربادی دی مورت بنا چھوڑیا، ایتھے بوہت گھٹ شہری رہ گئے سن اوہناں دا وی چنگا حال نئیں سی۔ بادشاہ نوں لہور شہر نوں وسان لئی فیر توں کارروائیاں کرنیاں پے گئیاں۔

اپنی رائے دا اظہار کرو