اسلام آباد (طارق بٹ)
کرتار پور لانگھا کھولن بارے تفصیلی گل بات کرن لئی بھارت جاون آلے پاکستانی سرکاری وفد دا دورہ خطرے اچ پے گیا۔ ذرائع مطابق ایہ دورہ پلوامہ حملے مگروں دوہاں ملکاں وچکار پیدا ہوون آلے کھچاؤ اَتے بھارتی ہٹ دھرمی کارن ٹال دتا گیا اے۔ پاکستانی وزارتِ خارجہ دے وفد نے 13 مارچ نوں گوانڈھی ملک دا دورہ کرنا سی۔ آس کیتی جا رہی سی پئی ایس دورے وچ پاکستان تے بھارت دے سرکاری عہدیداراں نے کرتار پور لانگھے اُتے گل بات کر کے ایس ماملے نوں اگانہہ ودھاؤناں سی تاں جے ایہدے بارے دوہاں ملکاں وچکار کوئی اخیری معاہدہ ہو سکے۔ پاکستان کرتار پور صاب لانگھا کھولن دے حتمی طریقہ کار بارے ماملات چھیتی نبیڑن دا خواہش مند اے تاں جے ایس لانگھے راہیں یاتری سوکھت نال آ جا سکن۔ ذرائع دا ایہہ وی آکھنا سی کہ ایس کڑی دی اگلی بیٹھک پاکستان چہ ہونا سی۔
684
