سجنو! میرا تے خیال اے پئی اساں پنجابیاں رضاکارانہ طور تے اپنے اتے اردو مسلط کیتی ہوئی اے. پنجابی لئی کوئی ٹھوس کم کرن دی تھاں نعرے شارے مار کے, اپنی مرضی ٹھونس کے آکھاں وچ مٹی پا رہے آں. پنجابی تنظیماں ولوں جے سائنس تے ٹیکنالوجی, کمپیوٹر تے جدید علم وچ کمی دور کرن دی کوئی منظم تے لابھ وند کوشش نظر آندی اے تے شئر کرن دا مناسب آہر کیتا جائے تاں جے اسیں ماں بولی دے سچے کامیاں دے کارنامیاں تو جانو ہو سکیے تے عام لوکاں نوں چنگے طریقے نال پتہ لگ سکے جے اسی پھوکے فائر نئیں کر رہے.مثلا.
مینوں پتہ اے جے پنجاب ٹیکسٹ بورڈ نے چھیویں توں لے کے بارہویں تیک پنجابی اختیاری دیاں کتاباں چھاپ دتیاں ہویاں نیں. پنجاب, گجرات, سرگودھا تے کجھ ہور یونیورسٹیاں پنجابی وچ بے اے تے ایم اے دا نصاب چھاپ چکیاں نیں.پروفیسر ڈاکٹر سعید بھٹہ صاحب دی نگرانی وچ بی ایس پنجابی (چار سالہ نویاں لوڑاں دے مطابق) شروع ہو چکیا اے. ایم فل تے پی ایچ ڈی دیاں ڈگریاں وی کجھ یونیورسٹیاں کروا رہیاں نیں. محترم الیاس گھمن ہوراں کسے دور وچ ریڈار کہانی ورگیاں تحریراں لکھ کے پنجابی وچ سائنس دے بوہے کھولے سن.
ترلا اے جے کسے سجن دے علم وچ سائنس , ٹیکنالوجی , کمپیوٹر تے ہور جدید علم بارے پنجابی وچ کیتے ہوئے کم بارے جانکاری ہووے تے اوہ ضرور شیئر کرے. تاں جے مواد دی کمی دا رونا رون والیاں دی تسلی ہو سکے تے اعتراض کرن والیاں نوں ٹھک دا جواب مل سکے. ای پیپر سجن لہور اپنے صفحے کھڑے متھے پیش کر دا اے.
پروفیسر اکبر علی غازی, سیالکوٹ
780
