لکھاری
زاھد اقبال بٹ
تنھائی ھمیش صحت مند اثر چھڈ رھی ھوندی اے کیونجے تعلق داریاں دے چالے نہ ھوون دے برابر ھو جا وندے نیں تے تھانوں نہ ھی کسے نوں قائل کرن دی کھیچل کرنی پیندی اے ۔بندہ قائل وی دوجے نوں اودھو کردا اے جدوں اوہ آپوں اس دلیل وچ پھسیا ھوندا اے تے اپنے آپ نوں وی قائل کرنا چاٖٖوھندا اے اس واسطے دوجے دا دماغ دھگانے کھا رھیا ھوندا اے جے دوسرا دلیل من لوے تے اوہنوں فیر سب اچھا لگدا اے ۔کئیں دھائیاں توں انساناں بارے سندے چلے آرھے کہ ایھ خاندانی اے ا تے ایہ خاندانی نھیں ھر کوئی اپنے خاندان نوں خاندانی ثابت کرن لئی دلیلاں دے ڈھیر لا کے قائل کرن دی کوشش کر رھیا ھوندا اے ایہ فلانی نسل دااے تے ایہ اس نسل دا نھیں. ایہ ماچھی مّصلی اے شکل ویکھو اس دی مو نھہ نہ متھا جن پھاڑوں لتھا،ایھو جھیاں گھڑیاں کھاوتاں سندے چلے آرھے آن ایہ انساناں دی ونڈ تے فرقو فرقی ویھار دا سلسلہ جاری اے۔ گل زات پات ، نسل دی نھیں سگوں اپنے ھوون اتے یقین دی اے اک دوجے دا آدر کرن دی اے پر جتھے نکی ّعمرے وتکرے تے گھٹیا نسل تے نسلی ھوون دیاں رام کھانیاں راھیں کنی پکائیاں تے بدوبدھی رٹایا جاندیاں ھوون تے بڑے فخر نال آکھیا جاندا ھووے کہ توں تے کمی کمین دی اولاد ایں توں تے وڈیاں ھو کے کھوتے چارنے نیں ،توں کس کم داایں ، توں تے اذلاں دا بھکاں اے، ذات دی کوڑہ کرلی شھتیراں نوں جپھے ایھ کھاوتاں نھیں ایہ تے انساناں نوں ذلیل کرن دیاں ذلالتاں نیں ایہ انسانیت نوں اگانہ ودھن دیاں راھواں وچ مداخلتاں نیں جے میتھوں پچھوں تے سچ آکھاں ایہ تاں انسانیٹ دیاں ھلاکتاں نیں ۔سماج جمے بالاں دے دماغاں وچ وتکرے دیاں ایھو ٹسلاں تے بد گمانیاں بھر دا رھندا اے تے بالاں دی زندگی اتے بھروسا بھل بھلیکھے دی نظر ھوندا رھندا اے تے اجیھے سماج دے بال ٹک کے حیاتی نوں سمجھن تے اوھدے وچ بھرواں حصا تے صلاحیتاں دا مظاھراں کرن وچ ناکام رھندے نیں نتیجے چ ساری زندگی ڈھور ڈنگراں تے پشواں وانگوں گزار دیندے نیں پر جیکر بالاں دے ڈیٹے نوں ویلے سر پروگریمنگ دتی جاوے تے اوھدے نال بالاں نوں کھل کے زندگیاں دیاں ساریاں اٹکلاں دے تجربے کرن دتے جاون گے فیر ساڈے بالاں دی پیر سیپشن صدیاں پرانی نھیں رھوے گی ساڈے سارے بال نویں سماج دی اساری چ ھتھ ونڈاون گے تے ساڈے بالاں دا دماغ اجوکے سمے دیاں لوڑاں تھوڑاں نوں سمجھن توں قاصر نھیں رھوے گا جد کوئی کھندا ای کی تسیں بیمار اوہ تے سٹے وچ تسیں یقین نال پلے گنڈہ ما رلیندے اوہ تے تھاڈے جسم دے سارے جینز وی بیماری نال لمے پے جاندے نیں تےایہو سبق پکا کرلیندے نیں سٹے چ تسیں کدی وی اس بیماری توں چھٹکارا نھیں پا سکدے جے ایہ بیماری دا سبق اسیں پکا نہ کرئیے، اپنی زندگی دی پرسیپشن بدل کے اپنے جینز دی ریڈنگ وی بدل سکنے آن ،perception ھی تھاڈے حیاتیاتی ماملے کنٹرول کر دی اے جے اسیں اپنے آپ نوں طاقتور سمجھئے کسی وی سیچوایشن اگے لماں پین دی تھاں دھیاں نال ماملیاں نال ھتھ جوڑی کر ئے تے ایہ بیماری جان چھڈا کے نس جاسی۔گل کر رھیاں ساں بالاں دی ، جیکر ا سیں اپنے بالاں دی perception بدل دیواں گے تے اونھاں دی زندگی وی بدل جائے گی کیونجے سب جاندے نیں کہ نویں سماج نال جڑی پرسیپشن تے یقین نال بدھی پروگریمنگ ساڈے سارے بالاں دی زندگی بدل کے رکھدے گی تے فیر ایہ کمی کمین ، مصلی ، بے نسلے بال تھانوں کھوتے چار دے نھیں ایھ کسبی جھاز اڈاندے تے سارے پیشیاں وچ رنگ بھردیاں نظری آون گے۔۔۔۔۔
699
