486

2 تے 2 کِنے…..؟

طارق عزیز بٹ

موجودہ سرکار کیویں بنی، ایہہ سوال تریخ دا حصہ بن گیائے تے ایہدا جواب ویلا آپ دیسی۔ ایہہ ویلا عمران خان دی ذات تے تنقید کرنے دا وی نئیں، اصل تے مُڈھلا سوال سرکار دی کارگزاری اے، جیہدا اندازہ ایشین ڈویلپمنٹ بینک، ورلڈ بینک، آئی ایم ایف تے یونائیٹڈ نیشنز اکنامک اینڈ سوشل کمیشن دیاں پاکستان بارے تازہ رپورٹاں پڑھ کے لایا جا سکدئے، اِک توں ودھ اِک بھیڑی رپورٹ۔ اگلے کئی ورھیاں تائیں پاکستان دی شرح ترقی بھارت، بنگلہ دیش نوں تے چھڈو، مالدیپ تے نیپال نالوں وی اَدھی رہسی۔ روپے دی قدر گھٹن تے افراطِ زر ہور ودھن نال اوہ تباہی آسی کہ رہے ناں اللہ دا۔ جے سرکار آپنے اصلاحاتی ایجنڈے اُتے عمل کرن چ کامیاب ہوئی تے فیر 2021 یاں 2025 تائیں معیشت چ سدھار دی آس اے۔
وزیراعظم بننے توں پہلاں خان صاب نے جو آکھیا اَج سو فیصدی اوہدے اُلٹ کر رہے نیں۔ گورننس چنگی ہوئی نا معیشت، کرپشن مُکی نا سرکاری دفتراں وچوں رشوت، ٹیکس وصولی ودھی نا برآمدات، بجٹ خسارہ گھٹیا نا تجارتی خسارہ، پُلس سُدھری نا غریب نوں انصاف لبھیا، باہرلے ملکاں توں ڈالر آئے نا سرمایہ کاری۔ جے کُجھ ہویائے تے مہنگائی، ٹیکساں چ وادھا، وصولیاں چ گھاٹا، روپے دی بے قدری، قرضیاں دی بھرمار، نظام دی تباہی تے بدانتظامی۔
پچھلے مالی ورھے دے پہلے 9 مہینے وچ ترقیاتی منصوبیاں لئی607 ارب روپے دی تھاں ایس واری 449 ارب روپے ونڈے گئے نیں جیہڑا کہ 158 ارب روپے گھٹ اے۔ وزارتِ بلدیات، صحت، اطلاعات، آرٹس کونسلز، اکادمی ادبیات، سی ڈی اے تے ہورناں کئی محکمیاں دا بجٹ گھٹا دِتا گیائے، وفاق دی آمدن وچوں صوبیاں نوں اوہناں دا حصہ نئیں دِتا جا رہیا۔ دوجے پاسے مالی ورھا مُکن توں پہلاں ای وزارتِ دفاع دا بجٹ 50 فیصد نالوں چوکھا ودھا کے 1100 توں 1700 ارب روپے کر دِتا گیائے۔ ٹیکس وصولی ٹیچے توں 400 ارب روپے گھٹ ہو سکدی اے، ملکی قرضے ساڈھے 3 ہزار ارب روپے ہور ودھ گئے نیں، بجٹ خسارہ ڈھائی ہزار ارب روپے ہو سکدئے۔
تحریکِ انصاف دی سرکار آپنی ناکامیاں چھپان لئی ایدھر اودھر ہتھ پیر مار رہی اے تاں جے لوکاں دا دھیان دوجے پاسے لایا جا سکے۔ حکمراناں نوں ایہہ گل چیتے رکھنی چاہیدی اے کہ اِک بُھکھے غریب آدمی نوں کرپشن مکاون دے نعریاں، احتساب دیاں بھڑکاں، 18ویں ترمیم، بھارتی جارحیت دے خطرے یاں دفاعی معاملے نال کوئی غرض نئیں، سوائے مہنگائی دے۔
بُھکھ ایسی نامراد شے اے جیہڑی کسے نوں نئیں سیان دی، ایہہ کوئی دلیل من دی اے نا ایہدے اَگے کوئی تدبیر کم آؤندی اے۔ ایہہ سِدھے سبھاؤ پیش آؤندی اے تے آپنے ساہمنے آؤن آلی ہر شے گھاہ چھڈ دی اے۔
کِسے نے بُھکھے توں پُچھیا: ‘2 تے 2 کِنے ہُندائے؟’
بُھکھے تُرت جواب دتا: ‘چار روٹیاں…!’

اپنی رائے دا اظہار کرو

2 تبصرے “2 تے 2 کِنے…..؟

  1. 25 جولائی 2018 نوں الیکشن دی گنتی وچ دھاندلی ہوئی سی۔ ایس دھاندلی دا فیصلہ کرن لئی قومی اسمبلی دی اک کمیٹی بنائی گئی جیہڑی کم نہیں پئی کردی پر موجود ہے۔ پارلیمنٹ دے طریقہ کار دے مطابق تے ایس کمیٹی نے فیصلہ کرنا اے بئی 25 جولائی دا الیکشن ٹھیک سی یا دھاندلا ہویا سی۔ جدوں وی اپوزیشن جماعتاں نے موجودہ حکومت دے خلاف فیصلہ کن تحریک چلائی تے اوہدی بنیاد ایہہ گل ہی بنائی جاوے گی کہ حکومت دا مینڈیٹ ہی دھاندلی زدہ اے۔

تبصرے بند ہیں