529

کرپشن دا رولا

لکھاری راجہ مبین اللہ خان
پاکستان وچ تھوڑے تھوڑے چر مگروں کرپشن دا رولا شروع ہو جاندا اے تے ہر پاسے چور چور دی کھپ اینی پے جاندی اے بئی بندہ سن سن کے بولا ای ہو جاندا اے۔ ایس رولے نال ملک ہر وار کسے نویں بھنبل بھوسے وچ پھس جاندا اے۔ پھیر سیاست دان کھچ دھرو کے ملک نوں مڑ کسے راہ تے پاندے نیں تے اینے وچ کرپشن کرپشن دا وا ورلا پھیر اٹھ کھلوندا اے۔ ایس نحس چکر نیں ملک نوں ایس موڑ اتے لے آوندا اے بئی دل نوں ڈر لگن لگ پیا اے کہ رب خیر ای کرے۔ اپنے ایس ڈر پاروں میرا جی کیتا اے بئی دل دیاں گلاں لوکاں نال سانجھیاں کیتیاں جاون۔
سب توں پہلاں تے میں ایہہ آکھاں گا بئی چوری، کرپشن یاں کسے ہور طریقے نال کھاہدی وڈھی دے نال مذہبی، اخلاقی،سیاسی یاں معاشرے نوں دوجے نقصان تے ہو سکدے نیں پر جے صرف معیشت دی اکھ نال ویکھئے تے ایس طرحاں دا پیسہ جے ملکوں باہر نہیں گیا تے پھیر ستے ای خیراں نیں۔ کیوں جو معیشت دا اصول ایہہ اے بئی اوہ پیسے نال چلدی اے بھانویں اوہ پھتو دے ہتھ ہووے یاں نتھو دے بوجھے وچ ہووے۔ معیشت دے پہئے نوں ایس دے نال کوئی فرق نہیں پیندا۔
ملک دی معیشت نوں فرق اودوں پیندا اے جدوں پیسہ ملکوں باہر ٹر جاندا اے۔ کئیں بے سمجھ لوک آکھ دیندے نیں بئی درآمدات نال ملک نوں نقصان ہو جاندا اے۔ اوہناں نوں ایس گل دا پتہ نہیں ہوندا بئی ملک پیسے باہر گھل کے کجھ نا کجھ شیواں ملک وچ منگواندا اے تے اوہ شیواں معیشت وچ رل جاندیاں نیں تے نقد پیسیاں دی تھاں تے شیواں آج جاندیاں نیں جیہڑیاں معیشت نوں ودھاندیاں نیں۔
ایہہ گل بڑی ضروری اے بئی پیسہ پھیر وچ رہوے، لوکاں دے کھیسیاں یا تجوریاں وچ پیا پیسہ ملک دی معیشت لئی کسے کم دا نہیں ہوندا۔ ایس لئی ٹیکس لا کے، چندہ لے کے یاں لوکاں نوں شیواں ویچ کے پیسے نوں پھیرا لواندے رہنا چاہیدا اے۔ جیہڑا پیسہ جمیا پیا رہندا اے اوہ کسے دے کم دا نہیں سگوں نقصان دیندا اے۔

کاروبار وچ لایا پیسہ سب توں بوہتا فائدہ دیندا اے۔ ایس لئی سٹاک ایکسچینج وچ لایا پیسہ روزگار ودھاندا اے۔ تے ایہہ غلط فہمی بئی کسے اک کاروبار وچوں پیسہ نکل کے دوجے وچ چلا گیا تے اوس نال کوئی نقصان ہو گیا اے۔ اک کاروباری دوجے کولوں ہوشیاری نال پیسہ لے گیا تے سانوں ایڈی فکر کرن دی لوڑ نہیں ہونی چاہیدی کیوں جو ایس نال ملک دی معیشت تے کوئی فرق نہیں پینا۔
سب توں ودھ سرکاری ملازماں دی کرپشن ملک نوں نقصان دیندی اے کیونجو ایہہ لوکاں دے کم ڈک کے وڈھی کھاندے نیں تے ایس طرحاں معیشت دے پہئے نوں ڈکن دی کوشش کر دے نیں۔ نالے جیہڑا پیسہ اوہ وڈھی کھاندے نیں اوس پیسے نوں اوہ قانون دے ڈر توں لکا لیندے نیں یاں ملکوں باہر گھل دیندے نیں۔ ایہناں سرکاری ملازماں نوں کاروبار کرنا نہیں آؤندا تے اوہ دوسرے ملکاں وچ مکان یاں کوئی ہور ایہو گئی شے مل لے لیندے نیں۔
ایہہ بڑی اہم گل اے بئی چھوٹی معیشت وچ کرپشن دا اثر گھٹ ہوندا اے تے وڈی معیشت وچ اثر بوہتا ہوندا اے۔ جوں جوں معیشت ودھے اودھے نال نال کرپشن نوں مکاؤنا چاہیدا اےَ خاص کر سرکاری ملازماں دے بوجھے ہر ویلے پھرولے جاندے رہنا چاہیدے نیں تاں جو ایہہ ملازم لوکاں دا پیسہ گھٹ کے بہہ نہ جاون۔
جیہڑے وسیب یاں ملک سکینڈے نیویا یاں جاپان دے درجے تے اپڑ جاندے نیں اوتھے کرپشن نوں پھیر کوئی قبول نہیں کردا۔
میری کاڈھ ایہہ اے بئی کرپشن مکاون دی تحریکاں یاں اداریاں نوں کوئی فائدہ نہیں ہوندا سگوں ہور نقصان ہوندا اے۔
جے کرپشن دے خلاف کجھ کرنا یاں ہونا چاہیدا اے تے اوہ نرا سرکاری ملازماں دے خلاف ہونا چاہیدا اے۔

کجھ لکھاری بارے۔
راجہ مبین اللہ خان گوجرانولہ دے وچ جمے تے اسلام آباد دی قائد اعظم یونیورسٹی توں ایم اے کرن مگروں فلپائن وچ جا وسے نیں۔ اوہناں اوتھے نوکری کرن دی تھاں اپنا کاروبار شروع کیتا اے۔ راجہ صاحب نویں پود نوں ایہہ مت دیندے رہندے نیں بئی نوکریاں کرن دی تھاں اپنا کاروبار کرن۔ اوہ ایہہ وی آکھ دے نیں بئی لہندے دے ملکاں وچ جا کے دھکے کھاون دی تھاں پاکستانیاں نوں ایشیا دے ملکاں وچ کم کار شروع کرنا چاہیدا اے کیوں جو ایشیا دے ملک ترقی پئے کر دے نیں۔ راجہ مبین اللہ خان فیس بک تے لکھ دے نیں۔

اپنی رائے دا اظہار کرو

2 تبصرے “کرپشن دا رولا

  1. raja ji eh sachi gal kiti je paei sarkari mualazman da ghoos /rishawat mulkon bahara chal janda hae. par oonhan eh vi dasna chahida ae jera paisa karobar banday dojay mulkan le janday ne te oos da munafa apnay des wich naei lawnday unhan da ki keta jaye .zrdari de mahal te nawaz sharif de flatan baray ki karna chahida ?

  2. raja ji eh sachi gal kiti je paei sarkari mualazman da ghoos /rishawat mulkon bahara chal janda hae. par oonhan eh vi dasna chahida ae jera paisa karobar banday dojay mulkan le janday ne te oos da munafa apnay des wich naei lawnday unhan da ki keta jaye .zrdari de mahal te nawaz sharif de flatan baray ki karna chahida mein te doji bari naen bheja pr mera tabsarian uttay eh likhat aa jandi ae pae eh error je te duplicate cmmoent eay .eh kuch garbar je nazim wafa, te naumi ji eh waikho

تبصرے بند ہیں