530

پلوامہ حملہ بعدوں پاکستان دیاں مشکلاں

لکھاری: طارق عزیز بٹ

پچھلے ہفتے پاکستان دی سرحد لاگے ایرانی صوبے سیستان بلوچستان وچ پاسدارانِ انقلاب دی بس تے ہون والے خود کش حملے وچ 27 محافظ مارے گئے۔ جیش العدل نامی سنی مسلمان جنگجو گروپ نے من لیائے کہ ایس حملے پچھے اوہدا ہتھ سی، ایران مخالف ایہہ لڑاکا دھڑا 2012 وچ ساہمنے آیا سی۔ کمانڈر پاسدارانِ انقلاب میجر جنرل محمد علی جعفری نے الزام لایا اے کہ حملہ کرن آلے ایس دھڑے نوں پاکستانی سیکیورٹی فورسز دی پشت پناہی حاصل اے، جد کہ ایران نے واقعے وچ ملوث حملہ آوراں خلاف سرحد پار کاروائی کرن دا اشارہ وی دتائے۔
دوجے پاسے ایس حملے مگروں اگلے دیہاڑ ای بھارتی مل مارے کشمیر دے ضلع پلوامہ اندر حفاظتی دستے دی بس اپر ہوون والے خود کش حملے وچ 46 بھارتی سیکیورٹی اہلکار مارے گئے، جیش محمد نے حملے دی ذمہ داری قبول لئی۔ بھارتی حکومت نے حملے بعدوں ترت ایہدا الزام پاکستان اپر لاؤندیاں آکھیا کہ گوانڈھی ملک ایس ماملے وچ سدھا سدھا ملوث اے۔ بھارت نے پاکستان نوں عالمی پدھر تے سفارتی اکلاپے دا شکار بناون دا ہوکا دیندیاں ایہدے کولوں سبھ تیں من پسند قوم دا درجہ واپس لے لیائے اتے پاکستان ولوں منگوائیاں جان آلیاں کئی شیواں اپر محصول ڈیوٹی 200 فیصد تائیں ودھا دتی اے۔ ایس فیصلے کارن پاکستان بھارت وچکار پہلاں توں موجود معمولی تجارتی تعلقات وی مکن دا خطرہ اے۔ پاکستان دے مغربی تے مشرقی گوانڈھی دوہاں ملکاں وچ دو دیہاڑیاں اندر حفاظتی دستیاں اپر ہوون آلے دو وڈے خود کش حملے ڈَاڈھی تشویشں آلی گل اے تے کسے وڈی مصیبت ول اشارہ کر دے ہین کیوں جے ایہہ حملے ٹھیک اوس ویلے ہوئے نیں جدوں سعودی ولی عہد شہزادہ محمد بن سلمان علاقے دے اہم دورہ اپر ہین۔
پاکستان نے دوہاں حملیاں دی ڈَاڈھی نندیا کر دیاں ایس ماملے وچ بھرواں ہتھ ونڈاون دی پیش کش کیتی اے۔ بھارتی انتہا پسنداں پلوامہ حملے نوں بہانہ بنا کے پورے بھارت خاص کر مل مارے کشمیر اندر مسلماناں دے جان و مال تے حملے چالو کر دتے نیں تے نالے دوجیاں ریاستاں اندر پڑھن کشمیری جواناں نوں وی ڈرایا دھمکایا جا رہیائے۔ اساڈا مسلا ایہہ ہے کہ اک پاسے پاکستان پلوامہ حملے بارے ہتھ ڈنڈاون دی صلاح مار رہیائے اتے دوجے پاسے الزام لا رہیائے پئی بھارتی سرکار چوناں چتن لئی ایہہ حملہ آپ کرایائے۔ اساڈے حکمران اتے طاقتور طبقے دی مفاد پرستی تے غلط پالیسیاں کارن دنیا بھر اندر کوئی وی اساڈا وسا نئیں کردا۔ ہن حالت ایہہ ہے کہ جدوں وی اساڈے گوانڈھ یاں کدھرے ہور دہشت گردی دا کوئی وی واقعہ بعدوں ہوندئے پر انگلیاں سبھ توں پہلاں ترت اساڈے ول اٹھدیاں ہین۔ دہشت گردی کسے ہور ملک وچ ہوندی اے، وکھت پاکستان نوں پے جاندئے، ایہدا کارن ایہہ ہے کہ دہشت گردی بارے عالمی پدھر تے اساڈا مدعا کمزور اے۔ اسانوں ایہہ گل یاد رکھنی چاہیدی اے کہ بھارت خاص کر کشمیر اندر کسے وی طراں دی دہشت گردی نا صرف آزادی دی لہر سگوں پاکستان لئی وی نقصان دہ ہے۔ بھارتی مل مارے کشمیر اندر جیش محمد اتے لشکر طیبہ ورگے دہشت گرد دھڑے موجود ہوون کارن دوجیاں عالمی دہشت گرد تنظیماں نوں وی اوتھے پیر جماون دا راہ لبھ سکدئے جیہدا کشمیریاں اتے پاکستان نوں چوکھا نقصان ہوسی۔ پلوامہ حملے بارے امریکہ بھارت نال کھلوتا نظر آؤندئے، امریکی قومی سلامتی دے مشیر جان بولٹن دا آکھنا اے کہ بھارت نوں سرحد پاروں ہوون آلیاں دہشتگرد کارروائیاں خلاف آپنا دفاع کرن دا پورا حق اے تے ایس لڑائی وچ امریکہ پوری طراں بھارت دے نال کھلوتا ہے۔
نکے ہوندیاں اک کہانی سنی سی کہ اک آجڑی منڈا بھیڑ بکریاں چراؤن لئی روز جنگل لے جاندئے۔ اک دیہاڑ اوہ اکلا تنگ پے جاندئے تے اوہنوں اک مخول سجھ دئے۔اوہ اچی اچی رولا پانا شروع کر دیندئے ‘شیر آیا’، ‘شیر آیا’۔ اوہدی واج سن پنڈ والے نسے نسے آؤندے نیں تے اوہنوں پچھ دے ہین ‘کیہہ ہویائے؟’ اگوں اوہ آجڑی ہسدیاں آکھدئے کہ ‘ میں تے مخول کر رہیا ساں، کوئی شیر نئیں آیا.’ پنڈ آلے شرمندے ہو کے غصے نال بھرے واپس مڑ جاندے نیں۔ اگلے دیہاڑ آجڑی فیر اوہوئی حرکت کردئے، پنڈ آلے فیر نسے آؤندے نیں تے اوہناں نوں فیر نموشی ہوندی اے۔ انج کئی دیہاڑ ہوندئے، اک دیہاڑ آجڑی فیر رولا پاؤندئے پر پنڈ آلے نئیں آؤندے اتے اوس دیہاڑ شیر اصلوں آ کے آجڑی نوں بھیڑ بکریاں سنے کھا جاندئے۔ پاکستان دا ماملہ وی کجھ اجیہا ای لگدئے۔

اپنی رائے دا اظہار کرو