393

نال سجن دے رہئیے وو…!

لکھاری: طارق بٹ

اساڈے نال تاں انج ہویائے جیداں فلماں چہ ہوندائے، بندہ گھوڑے تے بیٹھا دبا سٹ گھوڑا نسا رہیا ہووے تے اک دم ہوائی جہاز اڈاؤن یا فیر سمندر دیاں ٹھلاں اتے سمندری جہاز چلاؤن لگ پئے۔ سوشل میڈیا دے ایس دور چہ اساڈے لئی آن لائن اخبار کڈھنا کجھ ایداں ای جاپ دائے۔ 30 ورھے پہلوں جد حسین نقی صاب دی آگوائی چہ پنجابی زبان دا پہلا اخبار روزانہ ‘سجن’ لہور نکلیا تے اوس ویلے ہتھ نال کتابت ہوندی سی۔ شروع توں لے کے آخری دیہاڑ تائیں ‘سجن’ نوں ڈھیر ساریاں اوکڑاں دا ساہمنا کرنا پیا، ایہدے وچ کم کرن والے سارے سجناں بہوں کشٹ کٹیا۔ ‘سجن’ دی کامیابی لئی سوانیاں وی پورا وس لایا، ہما صفدر آپنے گیہنے دھان کیتے، گوگی اتے زویا نے وی ہتھ ونڈایا۔ ‘سجن’ صرف ڈیڈھ ورھا چھپیا پر پنجابی زبان نوں اک نویں حیاتی دے گیا۔
ہن زمانا کمپیوٹر دائے اتے پورا اخبار کمپیوٹر تے تیار کیتا جاندائے۔ اسیں شائد آخری پیڑھی ساں جنہیں ہتھ دی کتابت ویکھی۔ سوشل میڈیا دی ترقی پاروں شیواں اکا بدل گئیاں ہین، ہن ہر بندہ آپنے وچار آپنی لکھت، آواز، تصویر اتے فلم راہیں ترت تے بڑی سوکھت نال دوجے بندے تائیں اپڑا سکدائے۔ 30 ورھے پہلے وانگوں اج وی ‘سجن’ نوں جان مار کے کم کرن آلے کامیاں، تجربہ کار پتر کاراں، فوٹو گرافرز اتے لکھاریاں دی کوئی تھوڑ نئیں، گل صرف نویں دور دیاں لوڑاں نوں سمجھن دی اے۔
جد میں پہلے دیہاڑ ‘سجن’ دے ویہڑے پیر دھریا تے مینوں پنجابی دا اک اکھر وی لکھنا پڑھنا نئیں سی آؤندا۔ ‘سجن’ مینوں لکھنا اتے سوچ وچار کرنا سکھایا۔ پڑھنا بہوں ضروی اے پر میرے خیال چہ لکھنا پڑھن نالوں وی چوکھا ضروری اے کیوں جے اساڈے ساہمنے کجھ لکھیا ہووے گا تاں فیر ای اسیں پڑھاں گے، جیکر اساڈے کول کجھ لکھیا ہوئیا نا ہووے تاں اسیں پڑھساں کیہہ؟ یقیناً انسان نے پڑھن توں پہلاں لکھنا سکھیا ہووے گا۔ کسے وی قوم دی ترقی اتے طاقت دا اندازا صرف ایس گل توں لایا جا سکدئے کہ اوہدی زبان کنی طاقتور اے، انسان نے اج تائیں جنی وی ترقی کیتی اے اوہدا مڈھ لکھت اے۔ پنجابی زبان نال پچھلے ڈیڈھ دو سو ورھے بہوں دھرو کیتا گیائے جیہدا اپا صرف پنجابی زبان چہ چوکھے توں چوکھا لکھ کے ای ہو سکدئے۔

اپنی رائے دا اظہار کرو