463

محمد حنیف رامے

لکھاری

اسلم ملک

اوہناں دا پور ٹبر چودھری اکھواندا سی پر اوہناں اپنے ناں دے نال چودھری نہیں لکھیا کیونجو اوہ آکھ دے سن بئی اوہناں سے ماں پیو غریب لوک نیں۔ اک ویلا آیا تے اوہی غریب ماں پیو دا پتر پنجاب دا سب توں وڈا چودھری بنیا۔۔ وزیر اعلی پنجاب دی پگ اوہناں دے سر رکھی گئی۔

پندرہ مارچ محمد حنیف رامے دا جمن دیہاڑ اے۔ اوہ پندرہ مارچ 1930
وچ فیصل آباد تے ننکانہ دے وچکار اک پنڈ بچیکی وچ جمے۔ چودھری غلام حسین واہی ویجی کرن والے آرائیں محمد حنیف رامے دے ابے دا ناں سی۔
دس سال دی عمر وچ اوہ لہور آئے تے اسلامیہ ہائی سکول بھاٹی گیٹ وچ پڑھے۔ اوہناں 1952 وچ گورنمنٹ کالج توں معاشیات وچ ایم اے کیتا۔ ایس دوران اوہ کالج دے رسالے راوی دے ایڈیٹر وی رہئے۔ اوہ کجھ چر لئی لارنس کالج گھوڑا گلی وچ استاد وی رہئے تے پھیر اوہ چودھری نذیر دے چھپائی دے ادارے مکتبہ جدید وچ ایڈیٹر بن گئے۔ کجھ چر اوہ ادبی رسالے سویرا دے ایڈیٹر وی رہئے۔ سویرا توں وکھ ہو کے اوہناں اپنا رسالہ ہفتہ وار نصرت کڈھ لیا۔ اوہناں اپنے ادارے دا ناں البیان رکھیا۔
پھیر اوہ 1965 وچ مرکزی اردوبورڈ وچ ڈائریکٹر ہو گئے۔ کجھ چر حنیف رامے ایوب خان دی کنونشن مسلم لیگ وچ رہن توں بعد 1967 وچ پیپلز پارٹی وچ رل گئے۔ اوہناں 1970 وچ مساوات دے ناں نال اردو دا اخبار کڈھیا جیہڑا پیپلز پارٹی دا بلار سی۔ پیپلز پارٹی دے جیہڑے چار مڈھلے اصول سن اوہناں وچ اسلامی سوشلزم وی اک اصول سی۔ ایس اصول نوں اگانہہ ودھاون لئی رامے نے چوکھا ٹل لایا۔ 1972 وچ اوہناں نوں پنجاب حکومت دا صلاح کار لایا گیا تے مارچ 1974 وچ اوہناں نوں پنجاب دا وزیر اعلی بنا دتا گیا۔ اوہناں نوں چار جولائی 1974 نوں اپنا عہدہ چھڈن لئی آکھیا گیا تے چار جولائی 1975 نوں اوہ سینیٹر بن گئے۔
کجھ ای مہینیاں مگروں اوہناں نے پارٹی چیرمین نال اپنے اختلاف پاروں پارٹی چھڈ دتی۔اوہ پیر پگاڑہ دی مسلم لیگ وچ رل گئے تے پیر پگارہ نے اوہناں نوں چیف آرگنائزر بنا دتا۔ اوس ویلے اوہناں اخباراں وچ بھٹو دے خلاف دب کے مضمون لکھے۔ اوہناں دا اک پمفلٹ بہوں مشہور ہوئیا جس وچ اوہناں لکھیا سی” بھٹو جی پھٹو جی” اوہناں اتے ڈیفنس آف پاکستان رولز دے تحت مقدمہ بنایا گیا تے اوہناں نوں پھڑ گے دلائی کیمپ وچ رکھیا گیا۔ ایک عدالت نے اوہناں نوں ساڑھے چار ورھے قید دی سزا سنا دتی۔ جنرل ضیا دا مارشل لگدیاں ای لہور ہائی کورٹ نے اوہناں نوں رہا کرن دا حکم دتا۔۔ رہا ہوون مگروں اوہ امریکہ ٹر گئے تے اوتھے پٹرول پمپ چلاؤندے رہئے۔ اوہ کجھ چر برکلے یونیورسٹی وچ پڑھاندے وی رہئے۔
چھ سال امریکہ رہن مگروں وہ پرت آئے تے مساوات پارٹی دی نیہہ رکھی۔
اوہناں دی پارٹی دا نعرہ رب، روٹی، لوک راج سی۔ اوہناں اپنی پارٹی دا نعرہ پنجابی زبان وچ کلی، گلی ، جلی ،لایا۔ رامے دی پارٹی لوکاں قبولی نہیں۔ 1986 وچ غلام مصطفی جتوئی دی پارٹی نیشنل پیپلز پارٹی وچ اپنی پارٹی نوں رلا لیا۔
حنیف رامے بارہ ورھیاں مگروں 1988 وچ اک واری پھیر پیپلز پارٹی وچ رل گئے تے پنجاب اسمبلی دے ممبر بنے تے پنجاب اسمبلی دے سپیکر بنے۔ محمد حنیف رامے نے اک کتاب پنجاب کا مقدمہ لکھی۔ ایہہ ایسا مقدمہ سی جیہڑا اوہناں پنجابی دی تھاں اردو وچ لکھ کے آپ ای ہار دتا۔ اوہناں دیاں دوجیاں کتاباں اسلام کی روحانی قدریں،موت نہیں زندگی، باز آؤ اور زندہ رہو، دب اکبر، تے نظماں دا اکٹھ دن کا پھول نیں۔
آخری عمر وچ حنیف رامے واصف علی واصف توں متاثر ہو کے اوہناں دے لیکچر سن دے سن۔

اپنی رائے دا اظہار کرو