246

محبتاں دے کھوجی .. لکھاری زاھد اقبال بٹ

لکھاری .. زاھد اقبال بٹ
انساناں نوں مڈھو دھیری اکھ ناٌل محبتاں کھوجن،لبھن دا سیاپا سر چڑھیا رھندا اے ، محبت کھوجن دا کوئی ڈھائے چڑھیا وطیرہ نھیں ، محبت لکھاں کفیات دی چنی (ڈوپٹہ) اے جس دے باریک دھاگیاں دی انتی دو سلائیاں دی محتاج نھیں تے نہ ھی ایہ طیہ کاریگری ھے جس دی انتی نوں توڑہ چاڑھن لئی اٹکلاں دی لوڑ ھے ۔ایہ انتی کرودہ توں پاک پونی وٹن دی کھیڈ ھے ، ملائیم دھاگے وچ رڑک، پریت کفیت نوں ساڑہ سواہ کریندی اے ، ھڈ ورتی ، کوھلو دے پھیرے ، گیڑھے ،کسر تاں ،حرکتاں خصلتاں ، ریاضتاں وارو واری پگن کھیڈ طفل تسلی تماشا ااے ۔۔۔۔ مترا ۔۔۔۔ چل فیر چرخے دا ٹورا ٹورئیے ۔۔۔۔۔۔ تے اپنے آپ نال سوال جواب کرئیے ۔۔۔۔ پوری حیاتی اکھ کمان دی جوہ وچ ہر ویلے مویا سویا ، تھکیا ٹٹیا رھنا ایں ، اپنے جسم دے چوفیرے کھلرے ڈکریا دی ھک مورت بنا کے دس ، ھسدے وسدے جنگل بیلے وچ بیگانہ ، تریھیا ، بھکھا سکا وچ بازارے گواچیا رھنا اے ، کداں ‘ اپنی مڈھلی الیکی لکیر دسن دی ھمت تاں کر ، دوجیاں دی اکھی وچوں اپنا آپ لبھدا رھناں اے ، کدی اپنی اکھ وچوں اپنا آپ لبھن د ا راز تاں دس ۔انج پڑھدیاں ،تختیاں لکھدیاں ، گنتدیاں کردیاں تھک جائیں گا اوہ مورکھا کدی بے حساب ھونا تاں دس ، قصے کھانیاں شھزادے تے شھزادیاں دیاں مہربانیاں ، قربانیاں سن سن تھک گئے آں ، مترا کدی اپنے اندر لگے مچ ، لکیاں بجھارتاں دل کھول کے تاں دس ۔۔۔۔۔

اپنی رائے دا اظہار کرو

محبتاں دے کھوجی .. لکھاری زاھد اقبال بٹ” ایک تبصرہ

  1. سجنوں مترو ” محبتاں دے کھوجی ” ..
    پڑھن صلاحن دامنوں آدر کرنا آں ۔۔۔زاھد اقبال بٹ

تبصرے بند ہیں