510

فلسطین دا سفنا ٹٹ گیا

لکھاری
فہد احمد مسن

فلسطینیاں دا اپنا ملک لین دا سفنا چکنا چور ہو چلا اے، فلسطینیاں دے دشمن کٹھے ھو چکے نیں۔ نو اپریل نوں فلسطینیاں دا سب توں وڈا ویری بینجمن نیتن یاہو اپنی فلسطین دشمنی دا نعرہ ویچ کے چوناں جت گیا اے۔
ایس توں پہلاں نیتن یاہو نے ست اپریل نوں اعلان کیتا سی بئی جے اسرائیلی اوس نوں ووٹ دیون گے تے اوہ لہندے کنڈھے تے وی مل مار کے اوس نوں اسرائیل دا حصہ بنا دیوے گا۔
چوناں توں پہلاں نیتین یاہو اپنی کرپشن پاروں بدنام سی تے ہن فلسطین دے علاقیاں اتے مل مارن دے اعلان کر کے اوہ یہودیاں دا ہیرو بن گیا اے۔
سارے اسرائیلیاں نو اپریل نوں پولنگ بوتھاں تے جا کے اپنی ووٹ دی پرچی نال فلسطین دشمنی دا اظہار کیتا جس دا نتیجہ ایہہ نکلیا بئی دنیا دی امیداں دے خلاف 35 سیٹاں جت کے تاریخی فتح حاصل کر لئی۔ ایس طرح نیتن یاہو اسرائیل دے موڈھی بن گورین توں بعد سب توں زیادہ واری حکومت بناون والا وزیر اعظم بن گیا اے۔
چوناں وچ ہارن دے کنڈھے تے کھلوتے نیتن یاہو نے اپنے مذہبی جنونی یہودی اتحادیاں نوں لالچ دتی سی بئی جے تسی میرے نال رل جاو تے میں فلسطین دے علاقیاں نوں وی اسرائیل وچ رلا لواں گا۔
ایہہ نعرہ لا کے اوس چوناں جت لئیاں تے سارے اتحادیاں نے کجھ دیہاڑے پہلوں ایہہ اعلان کیتا بئی اوہ نیتین یاہو نوں وزیر اعظم بناون گے تے اسرائیل دے تاریخی ملک نوں مڑ اکٹھا کر کے مذہبی فرض پورا کرن گے۔
پچھلے کئیں دہاکیاں توں جدوجہد وچ لگے ایہناں اتحادیاں وچ سب توں وڈا مذہبی یہودی اتحاد جیہڑا بنیاد پرست لوکاں دا اکٹھ اے جو یہودی ساری دنیا اتے یہودیاں دی حکومت دے سفنا ویکھدا اے۔
ایس اتحاد نے اسرائیلی پارلیمنٹ (نیسٹ) دی 120 سیٹاں وچوں 66 سیٹاں جت لئیاں نیں۔ ایس توں پہلاں اینیاں سیٹاں کدی کسے پارٹی یاں اتحاد نے نہیں جتیاں سن۔ نیتن یاہو دی اپنی پارٹی لیکود نے 35 سیٹاں جت لئیاں جیہڑیاں ایس پارٹی دی پچھلے چوناں وچ جتیاں سیٹاں توں پنج زیادہ نیں۔
ایہہ اسرائیل دی تاریخ وچ پہلی واری ہویا اے بئی مذہبی جنونیاں دے اتحاد نوں اینیاں سیٹاں ملیاں نیں۔ مذہبی انتہا پسنداں نوں اسرائیلی چوناں وچ کامیابی ملنا مشرق وسطی دے مستقبل لئی کوئی چنگا شگون نہیں۔
ایس توں وڈی خوفناک گل ایہہ اے بئی ساری دنیا وچ اے سجے پاسے دیاں جماعتاں حکومت بنا رہیاں نیں جیہڑی کہ ایس دنیا لئی خطرے دی نشانی اے۔
ایہہ گل سبھ نوں پتہ اے بئی شام، لبنان، لیبیا، عراق، یمن الجزائر، مصر تے تیونس وچ خانہ جنگی پاروں ایہہ ریاستاں کمزور ہو چکیاں نیں۔
ایہہ گل پکی اے بئی مسلمان ملکاں دے حکمراناں نے کدی صدق دل نال فلسطینیاں دی آزادی لئی جنگ نہیں لڑی سگوں اپنی ذات نوں اسلامی ہیرو بناون نرے نمائشی کم کیتے تے ایویں منہ چک کے کسے منصوبہ بندی توں بنا ای اسرائیل نوں جنگ دے چیلنج دیندے رہئے۔
ہن حالات ایہہ ہو گئے نیں بئی امریکہ نے یروشلم نوں اسرائیل دا دارلحکومت من لیا اے تے ہن نال ای گولان دیاں پہاڑیاں وی اسرائیل کا حصہ من لئیاں۔ دنیا دے سارے ملک ہولی ہولی یروشلم وچ اپنے سفارت خانے کھول رہئے نیں۔
ایہناں حالات نوں ویکھدیاں نیتین یاہو ہن لہندے کنڈھے نوں اسرائیل دا حصہ بنا لئے گئے تے کسی عربی یا ہور مسلمان ملک وچ اینی طاقت نہیں بئی اوہ فلسطینیاں دی آزادی دی واج وی چک سکے۔
ہن فلسطینیاں دا ملک آزاد بنن دا سفنا ٹٹ جائے گا۔

اپنی رائے دا اظہار کرو

فلسطین دا سفنا ٹٹ گیا” ایک تبصرہ

تبصرے بند ہیں