470

درخت تے بھونکدا کتا، سرکار نال ہتھ ہوگیا

لکھاری، وسعت اللہ خان
شکریہ بی بی سی
انگریزی دا محاورہ اے ’بارکنگ اپ دی رانگ ٹری‘ یعنی غلط درخت اتے بھونکنا۔ ایہہ کجھ ایسران اے پئی اک کتا کسے شکار دا پچھے نٹھدا اے اوہ شکار تیزی نال درخت اتے چڑھدا فیر دوجے درخت اتے چھلانگ لاکے کدھرے دا کدھرے چلاجاندا اے، کتا ایہو سمجھدا اے اوہ پہلے درخت اتے وے، کتا اوہدے اتے بھونکدا رہندا اے، چرمگروں اوس نوں پتہ چلدا اے شکار تے کدوں ٹرگیا اے، اوہ بے دوش درخت اتے اویں بھونکیں جارہیا سی۔
ذرا غور کرو اسیں سارے روز دیہاڑی کنی وار ایہہ حرکت کردے آں، پھل یا سبزی مہنگی ملے تاں گالاں ریڑھی والے نوں کڈھدے آں۔ جدکے اوس غریب نوں تاں آپ سامان منڈی دے کسے سودخور، ذخیرہ کرن والے آڑھتی تون مہنگے مُل اتے خرید کے لیاندا اے تے اپنا منافع رکھ کے سانوں ویچ دیندا اے۔
پٹرول دی قیمت 8 روپے لیٹرودھ گئی تاں موٹر سائیکل سوار پٹرول پمپ والے منڈے اتے غصہ کڈھدا اے جدکہ ایہہ وادھا تاں اوگرا دی سفارش اتے سرکار کردی اے۔ ایس نمانے منڈے دا ایس سارے معاملے نال نہ اک لینا نہ دو دینا اے۔
بجلی تے گیس دے بل تارن والے کئی بھولے بندے ویکھے جیہڑے بل ودھ آون دی شکایت اوس مسکین بینک کیشئر نال کررہے ہوندے نیں جیہدا کم نرا تہاڈا بل لے کے پیسے گن تے جمع کرکے مہر لاون مگروں بل تہانوں موڑ دینا ہوندا اے۔
عید اتے من مرضی دے کرائے ٹرانسپورٹ کمپنی دے سیٹھ دی تجوری وچ جا رہے نیں مگر غصے وچ بھرے مسافراں دے ہتھ بس ڈرائیور تے کلینر دے گلموئے اتے ہوندے نیں۔ ہر بازار وچ مفت پارکنگ دی تھاواں اتے وی پیسے بدمعاشیہ وصول کر رہی اے مگر گڈی والے پارکنگ پرچی تھمان والے لمڈے دی ماں بہن اک کر رہے ہوندے نیں اوہ منڈ آپوں دو ڈھائی سو روپے دی دہاڑی اتے ایہہ گالاں سنن اتے مجبور ہوندا اے۔ اوس وچارے نوں تاں اصلی بدمعاش دا نام تیک نئیں معلوم ۔
ایہو حرکتاں کرن والے اسیں تے تسیں ہن پی ٹی آئی حکومت دے پیچھے پئے آں۔ حالانکہ اوہناں وچاریاں دا بس ایناکو قصور اے کہ اوہناں نوں نکے ہوندیاں توں سرکار سانبھن دا چاء سی، بادشاہ گراں اوہناں شوق پورا کردتا تے ظالم مجمے اگے ڈاء دتا۔
بالکل انج ای اے جیویں نکا بال جد گڈی چلاون دی باربار ضد پھڑلوے تاں وڈا بھرا یاں ابے ہوری اوس نوں اپنی جھولی وچ بٹھاکے سٹیرنگ اوس دے ہٹھ پھرا دیون تے لگے انج ای جیویں اوہو گڈی چلارہیا اے۔
ہن آٹھ نو مہینیاں مگروں ایہہ احساس ہو رہیا اے کہ ایہہ سرکار نئیں چاکری اے تے کم بس ایناکو ای اے کہ روز دیہاڑی داتا صاحب جانا اے لنگر توں اپنا کھالینا تے شاپر ڈبل کرواکے مالک لئی وی کھانا لیانا اے۔ ہوسکدا اے میں کوئی ودھ گل ای کردتی ہووے، تے صورتحال انج دی ناں ہووے۔ چلو اینو کجھ ایسراں سمجھ لیندے آں، کہ سرکار لمیٹڈ کمپنی وچ پی ٹی آئی نوں اکونجا فیصد شئیرز دتے نیں تے انجا فیصد دوجے اداریاں اپنے ہتھ وچ رکھے۔ خان صاحب نوں کمپنی دے بورڈ آف ڈائریکٹرز دا چیرمین بنا دتا گیا۔
مگر سٹاک دے حالات بہتر ہون دی تھاں کجھ تیزی نال تھلے ڈگے کہ پی ٹی آئی نوں اپنے 30 فیصد حصص دوجے پارٹنراں نوں ویچنے پے گئے۔ تاں جے کمپنی دیوالیہ نہ ہوجاوے۔ ہن پی ٹی آئی کول اکیس فیصد دوجیاں کول 79 فیصد شئیرز آ گئے نیں۔ پالیسی اکثریتی شیئر ہولڈراں دی چل رہی اے مگر خان صاحب بدستور اعزازی چیرمین نیں تاں جے جنہوں وی چنگا برا کہنا اے اوہ خاں ہوراں دی تصویر نوں کہہ لووے اوہدا دھیان تصویر دے پچھے کیہڑے نیں اوہناں اتے نہ جاوے۔
بوہت چر پلاں اخباراں وچ خبراں آندیاں سن کہ سادہ لوکاں نوں ریکروٹنگ ایجنٹ نے دبئی دا جھانسا دکے دو دیہاڑے سمندر وچ سفر کران مگروں گوادر نیڑے لنگرانداز ہوکے مسافراں نوں آکھیا لو بئی تہاڈے پیسے پورے ہوگئے تہاڈا دبئی آگیا اے۔
لگدا جیویں چالو سرکار نال وی کجھ انج ای ہویا اوس نوں کجھ آکھنا جیویں درخت اتے کتے دا بھونکنا ای اے۔

اپنی رائے دا اظہار کرو

درخت تے بھونکدا کتا، سرکار نال ہتھ ہوگیا” ایک تبصرہ

تبصرے بند ہیں