282

آپ نال محبت، سیلفی تے فرائیڈ دی سوچ

یونانی دیو مالائی داستان دا اک دیوتا نارسی رجھ سوہنا سی اک دیہاڑے اوہ کدھرے جاندے راہ وچ اک چشمے تے پانی پین لئی رک گیا۔ اوس صاف ستھرے پانی وچ جد اپنا آپ ویکھیا اوتھے اک گبھرو وکھائی دتا۔ اوس نوں لگیا جیویں کوئی ہور اوس نوں ویکھ رہیا اے نارسی دیوتا اوس پرچھانویں دے جادو وچ گھر گیا۔ اوہ سبھ کجھ بھل بھلا کے اوتھے بیٹھا رہیا تے اخیر اوسے حالت وچ اوس دی موت آگئی۔

نفسیات دے ماہر فرائیڈ نے ایس قصے نوں نرگسیت آپ نوں پسند کرن دے ذہنی مرض نال تشریح دتی اوس دا آکھنا سی پئی بندہ اپنی ذات دی محبت وچ گرفتار ہوجاندا اے۔ کوئی انسان آپ نوں پسند
کرن وچ بہوں رجھیا رہوے تے کسے دوجے دے جذبات یا احساس دی کوئی پروا نہ کرے تے فیر اوہ ایس مرض دا پکا شکار ہوجاندا اے
فرائیڈ دا آکھنا اے خوشامد پسندی یا اپنی تعریف دا بھکھا انسان ہمیش ہرتھاں وکھووکھ طریقاں نال اپنی تعریف کردا رہندا اے، اوہ دوجے دے کردار اتے تنقید، نکتہ چینی، طنز یا مذآپ نوں چنگا سیانا سوجھوان وکھان لئی کردا اے۔


فرائیڈ دسدا اے پئی نارسسزم تے اک مرض اے، پر تھوڑا بوہت آپ نال محبت ہر بندہ کردا جے ایس نوں ودھا لتا جاوے فیر اوہ بندے دا روگ بن جاندا اے۔
بی بی سی اک رپورٹ وچ دسیا پئی اج کل سیلفی دا رحجان وی ایس دی اک شکل اے۔ بندہ کسے ودھیا تھاں تے اوہدے خوبصورتی نوں ویکھدا تے اوتھے وی اپنی مورت لان دی خواہش کردا ایس دا مطلب اے اوہ تھاں وچ وی آپ دی خوبصورت تلاش رہیا ہوندا اے۔
سائنسی پرچول دسدی اے پئی بھانویں زنانیاں آپ دا ودھ خیال رکھدیاں نیں، لیکن مرد نارسسزم یعنی آپ نوں چنگا سمجھن دے مرض دے بوہتے شکار ہوندے نیں۔ سوشل میڈیا اتے اپنی سیلفیاں پوست کرن دا رحجان ودھ رہیا اے ایس دا اکو کارن اے پئی اوس مرد دا خواہش ہوندی اے پئی اوس نوں ودھ توں ودھ ویکھن اوس دی تعریف کرن، اوہ گنتی ویکھ کے خوش ہووے۔
ساڈی مورتاں وچ کدھرے اسیں کلے، کدھرے چنگی تھاواں اتے سیر کردے چنگے تے مہنگے ریسٹورانٹس وچ کھانا کھاندے یا اہم تے مشہور بندیاں نال کھلوتے وکھائی دیندے آں، ویکھن والا ایس دا مقصد ویکھن والا سلاہنا کرے۔ ماہراں دا آکھنا اے جے ایس کم نوں وی دوجے یار بیلیاں نوں خوش کرنا مقصد ہووے تاں وی ایہہ نارسسزم دے روگ توں بچا سکدی اے۔ ایس صورت وچ لتی گئی سیلفی نوں شاید فرائیڈ وی چنگا سی سمجھدا۔

اپنی رائے دا اظہار کرو