308

وَڈا اپوزیشن اتحاد بناؤن دی تیاری

لہور (سجن رپورٹ) اپوزیشن دا تگڑا اتحاد، کَم شروع۔۔۔۔۔ پی ٹی آئی سرکار خلاف اپوزیشن پارٹیاں نوں اِک چھتری ہیٹھ لیاون لئی گل ٹُر پئی اے۔ ایس وار اتحاد توں اَکھاں چراون والے لیگی قائد نوازشریف نے اپوزیشن اَکٹھ دی گل چُکی اے۔ اوہناں خواجہ آصف دے ذمے دوجے لیڈراں نال گل بات دی ڈیوٹی لائی اے۔ نون لیگ دے اِک وفد نے پہلاں ای ایس کَڑی وچ پیپلز پارٹی دے چئیر مین بلاول بھٹو نال بیٹھک کیتی۔ ایس ملاقات وچ بلاول ہوراں مسلم لیگ نوں کوئی پَک نئیں کرایا پیپلزپارٹی والے اکھدے نیں پئی ماضی نوں ویکھئے تے نون والیاں اُتےاعتبار کرنا کوئی سوکھا کم نئیں۔ پیپلز پارٹی نے نون لیگ کولوں کُجھ یقین دہانیاں منگیاں نیں۔ خواجہ آصف چھیتی ہی مزہبی جماعتاں نال وی گل کرن گے۔ نون لیگ نے اپوزیشن دے گرینڈ الائنس دی قیادت پی ٹی آئی دے کٹر مخالف مولانا فضل الرحمان دے ہتھ دین دی صلاح وی دتی اے۔ ایس تجویز اُتے مشاورت دے بعد ای کوئی قدم چُکیا جاوے گا۔ دَسیا گیا اے پئی مسلم لیگ نون اگست وچ پی ٹی آئی دی حکومت خلاف تحریک چلاون دا پروگرام بنا رہی اے۔

اپنی رائے دا اظہار کرو