208

نواز شریف نوں باہر جاون دی پیشکش، شہباز نوں اہم پیغام

اسلام آباد:شہباز شریف نوں اچیچے حکومتی حلقیاں ولوں ایہہ سنیہے ملے نیں کہ اوہ میاں نواز شریف نوں ملک توں باہر علاج کران لئی راضی کرن۔
جانکاری رکھن والے ذریعے دسدے نیں کہ شہباز شریف نے نوازشریف نال گل کیتی اے، لیکن سابق وزیراعظم ہالے تائیں راضی نئیں ہوئے،نوازشریف دی والدہ ، اوہناں دی سالی تے گھر دی اک ہور زنانی نوں سروسز ہسپتال لیا گیا تاں جے اوہ نوازشریف نوں بیرون ملک علاج لئی رضامند کرسکن۔
دسیا گیا اے کہ حالیہ مہینیاں دوران نواز شریف دی موجودہ بیماری توں پہلاں جیہڑی ہن ڈاھڈی وگڑ گئی اے، اوہناں نوں علاج لئی تن وار ملک توں باہر جان دی پیش کش کیتی گئی۔ مریم نواز دے حوالے نال کہیا گیا سی کہ اوہناں دا سیاسی مستقبل چنگا اے لیکن اوہناں نوں کجھ چر لئی سیاست چھڈ دینی چاہیی دی اے، نواز شریف ایہہ تجویزاں رد کردتیاں سن۔ تے ایس گل اتے اڑ گئے کہ اوہ صرف میرٹ اتے ریلیف لین گے۔
دلچسپ گل ایہہ وے کہ نواز شریف دے سخت مخالف جنہاں وچ پی ٹی آئی تے اوہناں دی اتحادی جماعتاں جیہڑیاں نوازشریف دی بیرون ملک علاج دی سخت مخالف سن۔ اوہناں نے وی اپنا موقف بدل لیا اے، کیوجے اوہناں نوں خوف اے کہ سابق وزیر اعظم نال کجھ وی غلط ہوون دی صورت وچ سخت عوامی ردعلم سامنے آسکدا اے۔
ایہو جاپدا اے کہ ایس خوف کارن ای مرکز تے پنجاب وچ پی ٹی آئی حکومت تے نیب نے نواز شریف دی ضمانت درخاست دی مخالفت نئیں کیتی۔
پی ٹی آئی سرکار دا موقف اے کہ اگر نواز شریف نوں عدالت بیرون ملک علاج دی اجازت دیندی اے تاں سرکار نوں کوئی اعتراض نئیں ہووے گا۔ پی ٹی آئی دے اتحادی چوہدری شجاعت حسین تے شیخ رشید نے وزیر اعظم نوں آکھیا کہ اوہ نوازشریف نوں باہر جاون دی اجازت دے دیون۔

اپنی رائے دا اظہار کرو