317

نشوا دی موت۔ دارالصحت ہسپتال بند

کراچی (سجن رپورٹ) کراچی وچ اک پرائیویٹ ہسپتال “دارالصحت” نوں وزیراعلی سندھ مراد علی شاہ دے حکم تے ‘سندھ ہیلتھ کئیر کمشن’ نے بند کروا دتا۔ ایس ہسپتال وچ اک بالڑی نشوا دے غلط علاج نال فوت ہو جاون دے واقعے دے بعد بچی دے والد تے عام شہریاں نے احتجاج شروع کر دتا سی تے ایس ہسپتال نوں بند کرن دا مطالبہ کیتا سی۔
سندھ ہیلتھ کئیر کمشن دے چیرمین ڈاکٹر ٹیپو سلطان نے صحافیاں نوں دسیا کہ کمشن نے ہسپتال دی او پی ڈی بند کر دتی اے تے ایس ہسپتال وچ نویں مریض داخل کرن تے پابندی لا دتی اے۔ ہسپتال وچ ایس ویلے موجود مریضاں نوں زبردستی نہیں کڈھ سکدے۔ ایس توں پہلاں جدوں ہیلتھ کئیر کمشن دی ٹیم ہسپتال بند کرن لئی گئی تے ہسپتال دے مالکاں نے اوہناں نوں ڈکن لئی اپنے بندے منگوا لئے جیہناں آ کے ہیلتھ کئیر کمشن دی ٹیم نوں گھیر لیا تے اوہناں نوں ہسپتال بند کرن توں روکن دی کوشش کیتی۔ چیتے رہوے کہ دارالصحت ہسپتال وچ ایک نکی بالڑی نشوہ نوں عملے نے لط انجیکشن لا دتا سی جیہدے نال بچی دا پہلاں دماغ مفلوج ہویا فیر اوہ فوت ہو گئی۔ ایس واقعے دی سوشل میڈیا وچ مشہوری ہوون تے لوکاں بچی دے ماں پیو نوں انصاف دواون دی مہم چلائی۔ ایس مہم وچ ہزاراں پاکستانی شریک ہو گئے جیہدے بعد سندھ حکومت نے ہسپتال دے خلاف ایکشن لیا۔!لوکائی دے احتجاج تے پولیس نے بچی دے غلط علاج وچ ملوث دو ملزماں ثوبیہ تے معیز نوں پہلاں ہی گرفتار کر لیا سی تے باقی عملے دی گرفتاری لئی ہن کوشش کیتی جاندی پئی اے۔

اپنی رائے دا اظہار کرو