262

مہنگائی گرمیاں دی عید ٹھنڈی کردتی

ملک بھر دے کاروباری حلقے دسدے نیں پئی ایس ورھے مہنگائی دی شرح اچی ہوون پاروں لوکاں کی خریدن دی طاقت گھٹ گئی اوہناں عید اتے بوہوں تھوڑی خریداری کیتی۔

پیٹرولیم دی شیواں، یوٹیلیٹی بلاں دی قیمتاں وچ وادھا، روپے دی قدر گھٹ ہوون نال باہروں آون والی شیواں مہنگیاں ہوگئیاں۔
ڈان اخبار دی رپورٹ مطابق ملک وچ کھان پین والی شیواں مئی وچ 9.11 فیصد مہنگی ہوگئیاں جیہڑی کہ اپریل وچ شرح 8.8 فیصد سی۔
8
تاجراں دا دعویٰ اے کہ بالاں نال آون والے زیادہ خریدار کپڑے، جوتیاں، باہردا زیور ورگیاں شیواں دے مُل سن کے یاں تے خالی ہتھ ٹرجاندے رہے یا فیر گھٹ کوالٹی والی شیواں خریدن اتے مجبور ہوگئے۔

ایس پاروں وکری دا ٹیچا سیل ٹارگٹ وچ اوہناں نوں ناکامی ہوئی، تاجراں خریداراں نوں اپنے ول کھچن لئی، پرانا سٹاک سستا تے گھٹ مل اتے ویچ دتا۔ آل پاکستان انجمن تاجران دے چیئرمین نے آکھیا کہ جیہڑے گاہک تن توں چار جوڑے خرید کے لے جاندے سن اوہناں مُل سن کے اک یاں دو جوڑے ای خریدے۔ پنجاب دے بازاراں وچ خریداری 33 فیصد گھٹ ویکھن وچ آئی۔

دوجے پاسے مرکزی انجمن تاجران بلوچستان دے جنرل سیکریٹری دسیا کہ صوبے دی مختلف مارکیٹاں وچ خریداری وچ 30 توں 40 فیصد کمی ویکھی گئی۔ اوہناں دا آکھنا سی کجھ لالچی دکاندار رمضان وچ اپنے توں مُل ودھ کردیندے نیں جیہدے پاروں مہنگائی ہوجاندی اے۔

رپورٹ وچ دسیا گیا کہ مُل ودھن پاروں ماں پیو نوں ڈاھڈی مایوسی ہوئی اوہ وچارے بالاں دے انگلاں پھڑے بنا کجھ خریدے بازاروں توں ٹرجاندے رہے، جد اوہناں توں پچھیا گیا کہ تاں ایہو آکھنا سی پئی آمدن وچ کوئی وادھا نئیں ہویا پر شیواں اک ورھے دوران بوہت مہنگی کردتیاں اوہ عید مناون یا جون دے مہینے نوں کیویں گزارنا ایہہ سوچن۔

وچلے تے ماڑے طبقے ایہہ عید بڑی اوکھے سوکھے ہوکے گزاری ای۔ عید گرمیاں دی سی پر اوہناں لئی ٹھنڈی پے گئی۔

اپنی رائے دا اظہار کرو