214

نوازشریف دا مرض لبھ گیا، مریم فیر جیل ٹرگئی

لہور:
نواز شریف دا علاج کرن والے میڈیکل بورڈ دے سربراہ پروفیسر محمود ایاز نے دسیا کہ مرض کیہ اے، ابتدائی طور اتے تشخیص کر لی گئی اے۔ اوہناں دا کہنا سی کہ نواز شریف دی تلی دے بے ترتیب کم کرن نال پلیٹلیٹس ٹٹ رہے نیں۔
ڈاکٹر مطابق نواز شریف نوں اک دوا شروع کرا دتی گئی اے جد کہ دوجی دوا پورے جسم دے سکین مگروں دتی جاوے گی۔
نواز شریف دی بیٹی مریم نواز نوں سروسز سپتال توں کوٹ لکھپت جیل منتقل کردتا گیا۔
بدھ دی رات وزیراعظم عمران خان دی ہدایت اتے مریم نواز نوں کوٹ لکھپت جیل توں اسپتال لیایا گیا جتھے اوہناں نے والد نواز شریف نال ملاقات کیتی۔ ایس دوران مریم نواز دی طبیعت وی وگڑ گئی،جیہدے مگروں اوہناں نوں سروسز اسپتال وچ ای داخل کرلیا گیا۔
نوازشریف وی وی آئی پی روم نمبر اک وچ نیں جدکہ مریم نوازنوں وی وی آئی پی روم 2 وچ داخل کیتا گیا ۔
اسپتال ذریعاں دسیا کہ مریم نواز دے مختلف ٹیسٹ کیتے گئے تے اوہناں دی ای سی جی کیتی گئی جیہڑی کہ نارمل آئی۔
ذرائع مطابق مریم نواز نوں اک رات ہسپتال رکھن مگروں اوہناں نوں جمعرات دی سویرے جیل گھل دتا گیا۔

اپنی رائے دا اظہار کرو