251

عید مگروں سرکار مخالف اے پی سی دا فیصلہ

اسلام آباد ، بلاول ہاوس وچ پیپلزپارٹی ولوں اپوزیشن جماعتاں دا اکٹھ ہویا، جدا سدا سابق صدر آصف زرداری تے بلاول بھٹو دتا سی، افطار ڈنر وچ مسلم لیگ ن دی نائب صدر مریم نواز، سابق وزیراعظم شاہد خاقان عباسی، حمزہ شہبازشریف، سردار ایازصادق تے پرویز رشید شرکت کیتی، جے یو آئی دے آگو مولانا فضل الرحمان دیر نال اپڑے۔ جد کے دوجی سرکار مخالف جماعتاں دے لیڈر وی ایس افطار ڈنر دا حصہ بنے۔
اوہناں فیصلہ کیتا پئی عیدوں بعد مولانا فضل الرحمان دی صدارت ہیٹھ آل پارٹیز کانفرنس سدی جاوے گی، جدے وچ سرکار مخالف اکٹھ بناون تے احتجاجی تحریک چلاون دا فیصلہ کیتا جاوے گا۔
بلاول بھٹو نے آکھیا پئی ساری جماعتاں نال رابطے ودھاے جاون گے، کوئی اکلی جماعت پاکستان دے مسئلے حل نئیں کرسکدی۔

بی بی سی مطابق اپوزیشن سرکار خلاف گرینڈلائنس وڈااکٹھ دے مشن نوں شروع کرن جارہی اے، جدے وچ ساری وڈی سرکار مخالف جماعتاں اگے دی منصوبہ بندی کرن گئیاں۔
افطار ڈنر وچ مریم نواز دی آگوائی ہیٹھ ن لیگ دے وفد نے پیپلزپارٹی چیئرمین بلاول بھٹو نے وکھری ملاقات کیتی۔ جدے وچ ملک دی سیاسی صورتحال نالے سرکار دی کارکزاری اتے رجھ کے گل بات کیتی۔ ایس گل تے اتفاق کیتا پئی دوہاں جماعتاں نوں رل کے لوکاں دے مسئلیاں اتے جدوجہد کرنی ہووے گی۔

اپنی رائے دا اظہار کرو