252

عمران خان دی ملاقات، صدر ٹرمپ مسئلہ کشمیر اتے ثالثی دی پیشکش

وزیراعظم عمران خان نے پہلے دورے وچ امریکی صدر ڈونلڈ ٹرمپ نال وائٹ ہاؤس وچ ملاقات کیتی، جدے وچ امریکی صدر مسئلہ کشمیر اتے ثالثی دا کردار نبھاون دی پیش کش کردتی۔

ملاقات دے شروع وچ ای میڈیا دی موجودگی وچ گل کردیاں امریکی صدر نے آکھیا کہ وزیر اعظم عمران خان نال ملاقات چنگی تے خوشگوار ویکھ رہے نیں، آس اے ملاقات مگروں دوہاں ملکاں دے تعلق ہور چنگے ہوون گے۔ اوول آفس وچ گل کردیاں ٹرمپ دا کہنا سی کہ ‘افغانستان توں واپسی لئی امریکا، پاکستان دے نال کم کررہیا اے تے امریکا علاقے وچ پولیس مین نئیں بننا چاہندا۔
ڈونلڈ ٹرمپ نے وزیراعظم نال وچار وٹاندرا کردیا بھارت نال وگڑے تعلق وچ بہتری لیاون لئی کردار ادا کرن دی پیش کش کیتی۔
پاکستان دے حوالے نال صدر ٹرمپ دے ماضی دے موقف بارے سوال اتے امریکی صدر جواب وچ پچھلے امریکی صدراں اتے تنقید کیتی تے آکھیا میرا نئیں خیال کہ پاکستان نے ماضی وچ امریکا تے اوہدے صدراں دا آدر کیتا ، میں سمجھ دا آں کہ پاکستان، افغانستان دے حوالے نال بوہت کجھ کرسکدا اے، اوہناں ایس طراح نئیں کیتا۔ اک ہور الزام کہ پاکستان نے غلط صدراں نال معاہدے کیتے ایس نوں کون ویکھ دا اے۔
ا صدر ڈونلڈ ٹرمپ نے پاکستان تے بھارت وچکار پرانے مسئلے کشمیر اتے وی وچولے دا کردار نبھاون دی پیش کش کیتی۔
اوہناں آکھیا کہ جے ایس حوالے نال میں کوئی تعاون کرسکدا آں تاں میرے لئی بڑے مان جوگ گل ہووے گی۔
عمران خان نے آکھِیا کہ امریکا دنیا دے طاقت ور ترین ملک دی حیثیت نال برصغیر وچ امن لیاون لئی اچیچا کم کرسکدا اے۔
صدر ٹرمپ دسیا دو ہفتے پہلاں بھارتی وزیراعظم مودی وی اوہناں نوں کشمیر وچ مدد لئی آکھیا سی۔
عمران خان دا آکھنا سی ‘میں بھارت نال گل بات لئی اپنے ولوں کیتی کوششاں بوہت کجھ دس سکدا آں، جیہڑی مذاکرات شروع کرن تے اینہاں مذاکرات راہیں اپنے اختلاف مکاون لئی کیتیاں گئیاں۔ لیکن بدقمستی نال اسیں ہالے تائیں اگے نئیں ودھ سکے، مینوں آس اے صدر ٹرمپ ایس عمل وچ مدد کرن گے’۔
دوجے پاسے بھارتی وزارت خارجہ دے ترجمان رویش کمار نے ڈونلڈ ٹرمپ دے ریمارکس بارے اک بیان وچ آکھیا کہ نریندر مودی ولوں امریکی صدر نال کدے وی اجیہی درخاست نئیں کیتی گئی٫

اپنی رائے دا اظہار کرو