242

صحافت دا وڈا نام، ظفراقبال مرزا گزر گئے


انگریزی پترکاری وچ اپنے اک وکھرے انداز نال جانے جانا والے ظفراقبال مرزا جنہاں دی پہچان “زم” دے نام نال سی، 2 دسمبر نوں 83 ورھیاں دے عمر پاون مگروں دنیا توں ٹرگئے۔ اوہ 9 اگست 1935 وچ لہور جمے ، سنٹرل ماڈل توں مڈھلی تعلیم لین مگروں گورنمنٹ کالج توں پڑھے، 1962 وچ اوہناں انگریزی دے اخبار سول ملٹری گزٹ توں اپنے صحافتی کیرئیر دا آغاز کیتا۔ اوس توں مگروں زم نے پاکستان ٹائم وچ کم کرنا شروع کردتا جتھوں 1979 وچ ریٹائر ہوگئے، 1979 توں 1983 دے درمیان اوہناں اسلام آباد وچ دی مسلم وچ اسسٹنٹ ایڈیٹر دے حیثیت وچ کم کیتا۔ اوس توں مگروں ڈان اخبار آگئے جتھے 2000 تک صحافت کیتی۔ آخیرلے ویلے اوہ ڈان لہور ایڈیشن دے ریزیڈنٹ ایڈیٹر بن گئے سن۔ اوہناں 70 دی دہائی وچ دی پاکستان آبزرور لئے وی کم کیتا ، زم نے پاکستان ٹیلی ویژن تے ریڈیو پاکستان لئی وی سکرپٹ رائٹر دے طور اتے کم کیتا۔ انگریزی اخبار فرنٹئیر پوسٹ پشاور لئی وی لکھدے رہے۔
ظفراقبال مرزا ہوراں مسلم اسلام آباد دا ایڈیٹر بنن توں پہلاں ،سنیئر صحافی حسین نقی دے اخبار پنجاب پنچ تے مظہر علی خان دی ہفتہ وار ویوپوائنٹ وچ کم کیتا۔ ڈان دے سابق ایڈیٹر عباس ناصر دا کہنا ہے کہ 1984 وچ اوہ ڈان وچ کم کرن لئی پہلاں وار لہور آئے جس دوران اوہناں ایتھے ایس زندہ دل انسان نال ملے، اوہ سچی اک سوہنی روح دا مالک سی،
لہوری دے نام توں مشہور زم دے ساتھی سنگیاں تے پڑھیاراں مطابق اوہ اک زبردست استاد تے صحافیاں تے چنگا لکھن دی خواہش رکھن والے لکھاریاں دی دو نسلاں لئی اک وڈی آس سن۔ اوہناں دی لکھت دا وکھرا انداز، تیکھا مزاح، ایس دے نال وڈا دل ، سیاست تے سماج بارے بوہتا علم تے جانکاری رکھ دے سن۔ دوجیاں نال بڑا ہولی بولدے تے اوہناں دی اکھاں وچ اک چمک ہوندی۔ گل بات کرن دے ماہر سن۔ ذات وچ کسے قسم دی انا، آپ نوں وڈا دے خواہش نئیں سی،چ ہاں اپنے اندر ہر کسے لئی انصاف دا سدھا سانوں نظریہ لے کے چل دے رہے۔ اپنے 46 ورھیاں دے صحافتی کیرئیر وچ کدے اپنے اصولاں اتے سودا نہ کرن والے چند کنے چنے لکھاریاں وچ شمار کیتے گئے۔ اوہناں کسے ڈکٹیٹر یا ظالم نوں کدے شمار وچ نئیں لیاندا۔ اپنے ساتھی پتر کاراں لئی اک وڈا حوصلہ بنے رہے۔ اوہناں دی اصول پسندی نوں ویکھ دیاں نویں پتر کار وی بوہت کجھ سکھ دے رہے۔
زم اپنی ذات خاطر کدے سرکاراں توں فیدے نہ چکے۔ آخیرلے ویلے ٹیک حیاتی اکو ڈگر اتے چلدی رہی، اج ظفراقبال مرزا دے گزرن مگروں اصول پسندی دا اک ہور باب بند ہوگیا۔
اوہناں دے جنازے وچ صحافیاں سمیت سماج دے دوجے طبقیاں توں تعلق رکھن والیاں وچ شرکت کیتی۔

اپنی رائے دا اظہار کرو