170

سنگین غداری کیس دا فیصلہ نہ سنایا جائے، مشرف تے حکومت دی درخاست

سابق صدر تے آرمی چیف جنرل (ر) پرویزمشرف خلاف سنگین غداری کیس دا فیصلہ رکوان لئی پرویز مشرف دے نال وفاقی حکومت نے وی اسلام آباد ہائی کورٹ وچ درخواست دائر کردتی۔
اسلام آباد ہائی کورٹ نے دوناں درخاستاں اتے سنوائی اج 26 نومبر لئی متھ دتی اے۔ جیہڑی چیف جسٹس اسلام آباد ہائی کورٹ جسٹس اطہر من اللہ دی سربراہی ہیٹھ تن رکنی لارجر بینچ کرے گا۔
وفاقی وزارت داخلہ ولوں اسلام آباد ہائی کورٹ وچ دائر درخاست وچ بینتی کیتی گئی کہ 28 نومبر نوں کیس دا فیصلہ سناون توں روکیا جاوے۔
وزارت داخلہ دا مؤقف اے کہ سنگین غداری کیس وچ پرویزمشرف دے شریک ملزماں نوں مقدمے وچ شریک ای نئیں کیتا گیا، سرکاری وکیلاں دی ٹیم نوں 23 اکتوبر نوں ڈی نوٹیفائی کیتا گیا مگر 24 اکتوبر نوں ٹیم نے بغیر اختیار دے مقدمہ دی پیروی کیتی۔
وفاقی حکومت نوں پراسیکیوشن ٹیم بدلن دا اختیار اے، خصوصی عدالت دا فیصلہ محفوظ کرن دا 19 نومبر دا حکم نامہ کالعدم قرار دتا جائے، عبوری ریلیف دے طور اتے خصوصی عدالت دا فیصلہ معطل کیتا جائے تے عدالت نوں حتمی فیصلہ جاری کرن توں روکیا جائے۔

اپنی رائے دا اظہار کرو