418

بھارت چ عام چوناں شروع

اسلام آباد (نمائندہ سجن) بھارت دی 17ویں لوک سبھا دِیاں 543 سیٹاں لئی چوناں اَج شروع ہوسن جیہڑیاں 19 مئی تائیں جاری رہسن۔ عام چوناں چ 90 کروڑ توں وَدھ ووٹر اپنا ووٹ پاسن جیہدے لئی 10 لکھ توں چوکھے پولنگ سٹیشن بنائے گئے نیں۔ ایہہ چوناں 7 پڑاؤ چ ہوون گِیاں، پہلے پڑاؤ چ 20 ریاستاں اندر 91 سیٹاں لئی ووٹ پائے جاسن۔ 18 اپریل نوں 13 ریاستاں چ 97 سیٹاں، 23 اپریل نوں 14 ریاستاں چ 115 سیٹاں، 29 اپریل نوں 9 ریاستاں چ 71 سیٹاں، 6 مئی نوں 7 ریاستاں چ 51 سیٹاں، 12 مئی نوں 7 ریاستاں چ 59 سیٹاں اَتے 19 مئی نوں 8 ریاستاں دیاں 59 سیٹاں لئی ووٹنگ ہووے گی۔ ووٹاں دی گنتی 23 مئی نوں ہوسی اَتے اوسے دیہاڑ نتیجے دا اعلان کیتا جائے گا۔ اصل مقابلہ وزیراعظم نریندر مودی دی بی جے پی تے اتحادی پارٹی این ڈی اے (نیشنل ڈیموکریٹک الائنس) اَتے راہول گاندھی دی انڈین نیشنل کانگریس تے اتحادی پارٹی یو پی اے ( یونائیٹڈ پروگریسیو الائنس) وچکار ہووے گا۔ 272 یاں ایس توں وَدھ سیٹاں جتن آلی سیاسی جماعت اگلی سرکار بنائے گی۔

اپنی رائے دا اظہار کرو