447

بالاں خلاف جرم ودھ گئے

رپورٹ، وسیم عظمت
پاکستان وچ بالاں دے خلاف جرم دے درج کیتے کیس” 2018 وچ پچھلے ورہے توں 33 فیصد ودھ گئے۔ سارے سال وچ روزانہ اوسطا”دس بالاں نوں جرم دا نشانہ بناون دیاں شکایتاں رپورٹ ہوئیاں۔ بالاں متعلق کم کرن والی تنظیم ساحل نے “ظالم اعداد و شمار” دے ناں توں جاری ہوئی رپورٹ وچ دسی۔

ایہہ رپورٹ پاکستان دے 85 قومی تے علاقائی اخباراں تے تھانیاں وچ رپورٹ ہوون والےبالاں نال زیادتی دے وقوعیاں دی مونیٹرنگ کر کے بنائی گئی اے۔ رپورٹ وچ۔دسیا اے بئی سال 2018 دے باراں مہنیاں وچ بالاں نال زیادتی دے 3832 وقوعے رپورٹ ہوئے۔ زیادتی دا نشانہ بنن والیاں وچ 55 فیصد کڑیاں سن تے 45 فیصد منڈے، کڑیاں وچوں 5 سال توں گھٹ عمر تے 16توں 18 سال عمر دیاں بچیاں نوں بوہتے حملیاں دا نشانہ بنایا گیا جدوں کہ منڈیاں وچوں 6 توں 15ورھیاں دے بچےبوہتا نشانہ بنے۔ سب توں ودھ کیس پنجاب رپورٹ ہوئے تے ایس توں گھٹ سندھ توں رپورٹ ہوئے۔

سال 2018 وچ رپورٹ ہوون والے کیساں وچوں 923 بالاں دے اغوا، 589 ہم جنس زیادتی، 523 ریپ تے 345 ریپ دی کوشش، 282 ہم جنس پرستاں دے گروہ دے حملے، 99 بالاں دے غیرقانونی ویاہ تے 452 کیس ایسے نیں جنہاں وچ بالاں نوں غائب ہی کر دتا گیا۔ سال 2018 شروع ہی بالاں دے خلاف زیادتی دے خوفناک واقعے نال ہوئیا سی جدوں 9 جنوری نوں قصور شہر وچ اک 6 ورھیاں دی بچی زینب دی لاش کوڑے دے ڈھیر توں لبھی سی۔ ایس بچی دی لاش نے ستے پئے سماج نوں اک واری جھنجوڑ کے رکھ دتا، قصور وچ فساد ہو گیا جیہدے وچ دو بندے مارے گئے تے سوشل میڈیا وچ #justiceforzainab ایس واقعے تے رکھی ہوئی عوام دی چنگھاڑ بن گیا۔ فیر کجھ دن مگروں زینب جنی عمر دی ہی بالڑی نال پختونخوا دے اک پنڈ وچ۔زیادتی تے قتل دا وقعہ ہو گیا جیہنے لوکاں نوں ہور دکھی کر دتا۔

اپنی رائے دا اظہار کرو