372

’باباسکول دی کتاباں لے دیو ‘

راولپنڈی لاگے پنڈ موہڑہ کالو وچ سویرے آرمی دا طیارہ ڈگے کے تباہ ہوگیا،جیہدے وچ اکو ٹبر دے اٹھ جی سوندے رب نوں پیارے ہوگئے،
اکھی ویکھن والیا دسیا کہ جہاز ڈگن دا دھماکہ ڈاھڈا سی کہ مرن والیاں دی چیکاں ایہدے وچ دب کےرہ گئیاں۔

راولپنڈی دی تحصیل گوجر خان دے ہوٹل وچ بیرے دا کم کرن والا عبدالحمید اپنے ٹبر نال 20 ورھیاں توں موہڑہ کالو وچ رہ رہیا سی۔ وقوعے توں کجھ گھنٹے پہلاں اپنے نکے بھرا محمد خان نوں ملن سوہاوہ گیا سی ۔محمد خان مطابق عبدالحمید دی دھی بشریٰ مقامی سکول وچ تیجی جماعت دی پڑھیار اے، اپنے والد نوں کہہ رہی سی کہ بابا میرے کول سکول دی کجھ کتاباں نئیں ہن، جیہدے تے سکول ٹیچر مینوں چھاڑ پائی ،ایس لئی مینوں کتاباں لے کے دیو۔

عبدالحمید اوس نوں آکھیا کہ اوہ کل واپس آکے اوس نوں کتاباں لے دے گا۔
محمد خان روندے، ہچکیاں لیندے آکھیا بشریٰ نوں کیہ معلوم سی اوہ ہن سکولے نئیں جائے گی۔
وقوعے وچ عبدالحمید دی بیوی تے چار بال ہلاک ہوئے ،اینہاں وچ اک 14 ورھیاں دا منڈا وی سی، جیہدوں عبدالحمید وڈی آس لائی سی کہ اوہ بڑھاپے دا آسرا بنے گا۔ اوہدا ایہہ سفنا کدے حقیقت نئیں بن سکے گا۔
عبدالحمید دی اک نکی دھی زندہ بچی اے،اوہ ڈاھڈی زخمی اے۔دوجے مرن والیاں وچ عبدالحمید داسالہ بشیر،اوہدی بیوی تے دھی وی اے۔
محمد خان مطابق اوہ سارے اکو مکان وچ رہندے سن، اوہدے وچ موجوہ سارے بندے زندہ جل گئے۔
رپورٹ، بی بی سی

اپنی رائے دا اظہار کرو