341

ایٹمی ہتھیارمکاون دی لوڑ اے،امن کانفرنس

سیفما لہور وچ امن کانفرنس ہوئی جیہدے وچ سیاسی ادبی تے سول سوسائٹی دے آگواں نے پاک بھارت کھچ تے جنگی خطرے نوں مکاون لئی اپنی صلاح دتی۔امن کانفرنس وچ امتیاز عالم،فرحت اللہ بابر،پرویز رشید،حسین نقی، طارق فاروق، تحسین احمد تے دیپ سیدہ اپنے وچار دسے۔ امتیاز عالم نے سوال چکیا بئی پاکستان وچ جہادی تنظیماں دی ہن کیہہ لوڑ اے،کسے اک انتہا پسند دی کارروائی دو ملکاں نوں جنگ ول لے جاسکدی اے۔

پیپلز پارٹی دے آگو فرحت اللہ بابر آکھیا کہ کمانڈ اینڈ کنٹرول دا سسٹم کج لوکاں دے ہتھ نہیں ہونا چاہیدا۔اوہناں صلاح دتی کہ کمانڈ اینڈ کنٹرول سسٹم دا طریقہ پارلیمینٹ نوں بنانا چاہیدا اے۔ تحسین احمد نے ایس گل تے زور دتا کہ اک واری فیر ایٹمی ہتھیار مکاون دی گل کیتی جاوے۔اوہناں آکھیا کہ مسلح تنظیماں ملک لئی خطرہ نیں۔ طارق فاروق آکھیا بنیاد پرستی پورے جنوبی ایشیا وچ ودھ رہی اے،ایہناں اتے جنہاں دا ہتھ اے او امن دی گل وی نئیں کرن دیندے۔پاکستان وچ ایہہ گروپ ساریاں دے قابو توں باہر ہوگئے نیں۔مسلم لیگ نون دے آگو پرویز زشید ہوراں امن دی لوڑ اتے زور دیندیاں آکھیا بئی اس بارے ڈائیلاگ اک واری فیر شروع کرن دی صلاح دتی۔ کانفرنس وج گل کرن والے سبھی امن دے حق وچ بولے۔ایس موقعے تے شاعراں نے جنگ نوں رد کرن تے امن لئی کم کرن دے موضوع اتے نظماں تے غزلاں سنایاں۔

اپنی رائے دا اظہار کرو