311

سرکار نوں کارٹون سمجھ نئیں آیا


انگریزی اخبار دی نیشن وچ وزیراعظم عمران خان دا کارٹون بناون اتے انتظامیہ اپنے سنیئر کارٹونسٹ نوں سرکار دے دبا ہیٹھ آون مگروں نوکری توں فارغ کردتا۔ سنیئر صحافی خالد حسین پچھلے 30 ورھیاں توں ایس شعبے نال جڑے نیں، اوہ اک پروفیشنل کارٹونسٹ نیں، اوہناں دے بنائے کارٹون صحافت، سیاست تے سول سوسائٹی وچ بے حد پسند کیتے جاندے نیں۔

خالد حسین نے کارٹون وچ صدر ٹرمپ دی کشمیر اتے پاکستان بھارت نوں اک وار کیتی ثالثی دی پیشکش نوں، کجھ ایس طرح پیش کیتا پئی امریکا تے بھارت رل کے پاکستان نوں ثالثی معاملے اگے لایا اے، کارٹون وچ ٹرمپ تے مودی نال عمران خان وی نیں۔
انسانی حقاں دی وزیر شیریں مزاری نے اپنے ٹویٹ وچ ایس اتے سخت ردعمل وکھایا، اوہناں وضاحت کیتی پئی ٹرمپ ثالثی اتے راضی اے مودی بار بار مکر جاندا دوجا کارٹون وچ وزیراعظم دے عہدے دا آدر نئیں کیتا گیا۔
سرکار دی ردعمل مگروں اخبار انتظامیہ وزیراعظم دی تقریر والے دیہاڑ خالد حسین نوں نوکری توں کڈھ دتا۔
خالد حسین دا کہنا اے پئی اوہ وزیراعظم دی پالیسیاں دے حامی نیں، اوہناں نوں آس سی پئی عمران خان اقتدار وچ آکے میڈیا دے معاملیاں نوں ٹھیک کرن گے، لیکن جو کجھ اسیں ویکھ رہے آں، اوہ بوہت زیادہ مایوسی والا اے۔
بی بی سی نال گل کردیاں خالد حسین دا آکھنا اے ’غلطی حکومت دی اے جس نوں کارٹون سمجھ نئیں آیا تے اوہناں آکھیا کہ اجیہی انھے واہ کارروائی لئی سرکار ولوں دباو پانا بڑی افسوس جوگ گل اے۔ ‘
خالد حسین کہیا کہ حکومتی ردعمل اوہناں دی تنقید برداشت نہ کرنا تے سینسر شپ دی پالیسی نوں ظاہر کردا اے۔
پی ٹی آئی دی تبدیلی سرکار جد توں آئی اے، میڈیا انڈسٹری دے حالات خراب ہوندے جارہے نیں، اک ورھے دوران سیکڑاں نوکری توں کڈھے گئے، ہزاراں دیاں تنخواہاں گھٹ کردتیاں گئیاں، کئی ادارے مہینیاں تنخواہ نئیں دے رہے۔ دوجے پاسے ان ویکھی سنسرشپ تے خالد حسین نال ہوون والے واقعے وی ہورہے نیں۔

اپنی رائے دا اظہار کرو