292

انگلینڈ کرکٹ دا عالمی چیمپئن، فائنل 102 اوور مگروں ٹائی

لارڈز دی تریخی میدان وچ بارہویں ورلڈکپ دا فائنل نیوزی لینڈ تے انگلینڈ دی ٹیماں یادگار بنادتا۔ ٹاس جت کے نیوزی لینڈ پہلاں کھیڈن دا فیصلہ کیتا، 50 اووراں وچ 241 سکور بنائے، کیوی ٹیم دے 242 رنز دے ہدف دا پچھا کردیاں انگریزاں متھے گئے 50 اووراں وچ 241 رنز بنائے، ایسراں دوہاں دا سکور برابر ہوگیا، میچ ٹائی ہوون پاروں سپر اوور دا مقابلہ ہویا، جیہدے وچ چھ چھ گینداں دا اک اوور کھیڈن لئی دتا۔


ایس توں پہلاں انگلینڈ دے بین سٹوکس نے 84 سکوراں دی ستھری اننگز کھیڈی جیہدے کارن انگلینڈ دی ٹیم اک وار فیر مقابلے وچ آگئی، قنون تے ضابطے مطابق جے سپر اوور وی ٹائی ہوجاوے تاں فیر دوہاں ٹیماں دی باونڈریاں نال حساب لایا جاندا اے جیہدی ودھ ہون اوہ جیتو قرار دتا جاندا اے۔
انگلینڈ نے چھ گینداں اتے 15 رنز بنالے ایہدے وچ وی بین سٹوکس دے تن چوکے سن، جواب وچ نیوزی لینڈ دی ٹیم جنہوں ہن مقابلہ اوکھا وکھائی دے رہیا سی، اوہدے بلے باز نیشم تے گپٹل میدان وچ آئے اوہناں وی چھ گینداں وچ 15 بنالئے تاں میچ اک وار فیر برابر ہوگیا،

ورلڈکپ دی تریخ دا سبھ توں سنسنی پیدا کرن والا فائنل جیہدے وچ 102 اوورکھیڈے گئے فیر وی فیصلہ نہ ہوسکیا، قنون مطابق انگلینڈ بوہتی باونڈریاں لاون پاروں جیتو قراردتا گیا۔
بین سٹوکس فائنل دے ودھیا کھڈاری، جد کے نیوزی لینڈ دے کپتان کین ولیم سن ٹورنامنٹ دے ودھیا بلے باز قرار پائے۔

نیوزی لینڈ مسلسل دوجے ورھے فائنل تیک اپڑیاں مگر ورلڈکپ اوس دے نصیب وچ نئیں سی، انگلینڈ تریخ وچ پہلی وار عالمی کپ جتن وچ کامیاب ہوگیا۔
پاکستان جیہڑا ورلڈکپ وچ پنجویں نمبر اتے آیا، اوس اینہاں دوہاں ٹیماں نوں شکست دتی، اتفاق اے کہ مسلسل تیجی واری اے جیہڑے ملک وچ ورلڈکپ ہویا اوس دی ٹیم جت گئی۔

اپنی رائے دا اظہار کرو