367

پاکستان دا پرانا تھانہ ’پرانی انارکلی‘

پاکستان دی تریخ دے سبھ توں پرانے پلس سٹیشن پرانی انارکلی دے مال خانے توں اک بندے دا عدالتی ریکارڈ ملیا، جنہوں 65 ورھیاں پہلاں اشتہاری قرار دتا گیا سی، ایس اشتہاری دا نام عبد الرحمن اے جیہڑا پہلاں مشرقی پاکستان تے ہن دے بنگلا دیش دے شہر چٹاگانگ دا رہائشی اے۔ مقامی پلس اشتہاری ملزم نوں غیرملکی شہری قرار دے کے مقدمے نوں داخل دفتر کردتا۔

ایس اشتہاری ملزم نوں انٹرپول راہیں واپس لیان لئی کیتی جاون والی کوششاں دا وی کوئی ریکارڈ نئیں ملیا۔ اوس ویلےھ دی مقامی عدالت ملزم عبد الرحمن نوں اک بال نال زیادتی دے الزام وچ اشتہاری قرار دتا سی۔
اک سو ورھیاں پہلاں لہوردے ایس تھانے وچ بھگت سنگھ تے غازی علم دین خلاف مقدمات وی درج نیں،اینہاں مقدمیاں دا ریکارڈ ایس تھانے دے مال خانے توں نئیں ملیا۔

پرانے لہور دا تھانہ پرانا انارکلی 1860 وچ بنیاجدکے اوس ویلے انگریز حکمراناں نیں 1861 وچ پلس ایکٹ نافذکیتا سی، جدے بوہت حصے ہن وی پاکستان تےانڈیا دےپلس ایکٹ داحصہ نیں۔
ایس تھانے دے مال خانے وچ اک اجیہی ایف آئی آرداریکارڈ وی جیہڑا 1860 وچ درج کیتی گئی سی، ایس مقدمے دی لکھت بارے پولیس حکام پک نال نئیں کہہ سکدے ایہہ کس زبان وچ لکھی گئی سی۔

تھانے دےایس ایچ او طاہر محمود دسیا ایس ایف آئی آر وچ کجھ حصے اردو دے وی نیں،ہوسکدا اے مقدمہ فارسی وچ درج کیتا گیا ہووے۔ مقدمے دی لکھت وچ معلوم نئیں ہورہیا اوہ کیہڑا بندہ سی جہدے خلاف پہلا مقدمہ درج کیتا گیا سی۔
تھانے وچ 159 ورھی ریکارڈ موجود اے جیہڑا 1860توں لے کے 2019 تیک دا اے، ایہہ معلوم نئیں ہوسکیا، کہ تھانے دے مال خانے وچ ایس عرصے دا مکمل ریکارڈ موجود اے۔
انسپکٹر جنرل آف پولیس دفتر دے اک اہلکار مطابق جیہڑی تھاں اتے آئی جی پنجاب دا دفتر اے اوس دی کندھ کافی اُچی اے، تے ایہہ تھاں شہنشاہ جہانگیر دی سواری لئی رکھی گئی سی، جدوں اوہ ہاتھی اتے بیٹھ کے مرزا غیاث الدین دے گھر اوس دی دھی نورجہاں نوں ملن لئی آونداسی۔شہادتاں مطابق تھانہ پرانا انارکلی دی زمین شہنشاہ جہانگیر دی بیوی ملکہ نورجہاں دے والد مرزا غیاث الدین دی ملکیت سی۔

اپنی رائے دا اظہار کرو