300

تسی مسلمان او

لکھاری ،اکرم ہدایت اللہ

تسی مسلمان او!اے سوال مینوں اک بھرویں داڑھی والے 55، 60 ورھیاں دے اک وڈے سرکاری افسر نے اسلام آباد وچ اک جانن والے دے دفتر وچ اوس ویلے پچھیا جدوں میں اوس دی بار بارکیتی کوشش دے باوجود مذہب اتے اوس دی گلاں دا جواب ہاں ہوں وچ نہ دتا۔ تنگ آ کے میں پچھیا تسیں ایہہ (میرا مذہب جان کے) پچھ کے کیہ کرنا اے ۔ کہن لگے تسی پڑھے لکھے لگدے او تے پڑھے لکھے بندے تے مذہب وچ بہت دلچسپی رکھ دے نئیں نالے ایس تے بحث کرن دا شوق وی رکھ دے نئیں۔ تے جے تہانوں میریاں گلاں پسند ناں آئیاں تے فیر تسی کیہ کرو گے؟ میں آکھیا فیر تسی ایہہ وی طے کرو گے کہ میرا کس فرقے نال تعلق اے، ویسے ایسدا فیصلہ تے تسی میراں نام پچھ کے وی اپنے طور کر لو گے۔ تسی تے مذہب دے بڑے خلاف لگدے او، اوہنے کہیا۔بڑی چھیتی فیصلے تے پہنچ گئے او، میں جواب وچ کہیا ویسے میں مذہب دے خلاف کہیا کیہ اے جتھوں میں تہانوں مذہب دے خلاف لگیا ہاں ۔ میں تے انج ایں تہانوں چھیڑیا سی پئی ٹائم گزارن لئی پچھاں تسی کنے کو مذہبی او یا ہو وی یا نئیں۔ اوہناں آکھیا ۔ جس دے جواب وچ میں کیہامطلب تسی مذہب تے وقت گزاری لئی گل کرنا چاہندے اوہ تے نال اے ویکھن دی کوشش کر دے او پئی کہناں مسلمان اے تے جے تہاڈے توں گھٹ درجے دا اے تے اس دا درجہ ودھایا جائے۔ کہن لگے گل تے تہاڈی ٹھیک اے تے نال اے مسلمان ہوندیا ں میرا فرض اے کہ میں دوجیاں نوں چنگا مسلمان بناون دی کوشش کراں۔ پر ایہہ فیصلہ کرن دا اختیار تے رب نے اپنے کول رکھیا ہویا اے کہ طے کرے کون مسلمان اے، کناں متقی تے پرہیز گار اے،تسی رب دا اے اختیار کیویں استعمال کر رہے او، میں آکھیا،جواب وچ مینوں کچا مسلمان سمجھ کے پکا کرن دے کوشش کرن والےبابوصاحب نے کہیا تسی تے دہریے اوہ۔ میں کہیا ایس گل دا فیصلہ وی تے رب نے ہی کرنا اے، ٹائم گزارن لئی مذہب اتے گل کرن والے نے تے نئیں۔ ایہہ گل کہہ کہ ایس توں پہلاں کہ میں اوتھوں اٹھدا، سرکاری بابوں نے اوتھوں ایہہ آکھن مگروں اٹھ گئے کہ سارے فیصلے رب نے نئیں کرنے، اسیں وی کرنے ہوندے نیں۔

اپنی رائے دا اظہار کرو