574

ماڑا مسیر

لکھاری
عبدالکریم قادری
مسیر آخنے ماسی نے پتر کی یعنی خالہ ناں بیٹا۔ ویسے تہ اساں نے پوٹھوہار وچ جے تساں پبلک ٹرانسپورٹ اپر سفر کرو تہ ایتھے تساں کی سوزوکی، ویگن، بس یا ٹوٹا یعنی ہائی ایس نے کلینڈر (کنڈکٹر) مسیر آخی تے مخاطب کرسن، جس طرح کہ ‘‘مسیر کتھے جاسیں؟’’، ‘‘آ جی! ماڑے مسیرا، بئی گچھ’’، ‘‘مسیر جی! کرایہ چائی دیو’’ وغیرہ وغیرہ۔ ایہہ وکھری گل اے کہ جتنی جلدی اوہ بندے نال رشتہ جوڑی تہ مسیر بنائی کننے، ایہہ رشتہ توڑنیاں وی اوہ ذرا دیر نی لانے، جے بندے کول یعنی مسیر کول کرایہ ناں وے تہ۔
دنیا اپر بڑے بڑے مسیر گزرے ہوسن، پر ماڑا وی اک مسیر اے، جس نے ویسے تہ بُوں واقعے مشہور اے پر اُناں وچوں چیدہ چیدہ مختصر طور اپر میں ایتھہ نالو نال یعنی وقفے وقفے نال بیان کرساں۔
پہلا واقعہ اس طرح اے کہ ماڑا مسیر اپنے محلے نی اک گلی وچوں جلناں پیا سا تہ اُس نی نظر اک مکان نی تیسری منزل اپر پئی گئی، جتھے اک سوہنی جئی کُڑی (لڑکی) کپڑے پئی کھلیارنی پئی سی، ماڑے مسیر اُس کی غور نال تکیا، کُڑی نی وی نظر ماڑے مسیر اپر پئی گئی کہ ایہہ مِیکی بڑے غور نال پیا تکنا، کُڑی اک دم نظر پھیری کِندی جبکہ ماڑے مسیر اپنی نظر اوتھے ای رکھی رئی، کُڑی تھوڑی دیر بعد فیر ماڑے مسیر کی تکیا جیہڑا اُس کی مسلسل تکنا پیا سا۔ کُڑی کی آ گیا غصہ، تہ اُس ماڑے مسیر اپر تھک سٹی چھوڑیا، ماڑا مسیر اک دم پیچھے ہوئی گیا، تھوک چونکہ تیسری منزل اپروں آیا سا، ماڑے مسیر کی ٹائم ملی گیا تہ اس اپنے کی بچائی کِندا۔ کُڑی نی اس بے ہودہ حرکت کرنے اپرماڑے مسیر کی وی آ گیا غصہ، تہ ماڑے مسیر اسے غصے وچ گلی وچ کھلتیاں اپر منہ کری تہ زور نال تھک سٹیا، جیڑا سیدھا تیسری منزل اپر کھلتی کُڑی نے منہ اپر لگا تہ او بڑی شرمندہ ہوئی گئی۔ ماڑے مسیر اونچی آواز وچ آخیا۔ ‘‘ہُن آرام ای’’، تہ اگے ٹُری پیا۔

اپنی رائے دا اظہار کرو

ماڑا مسیر” ایک تبصرہ

  1. مسیر جی! بہوں سوہنا لِخنے او، لِخی تے رکھو

تبصرے بند ہیں