443

ماڑا مسیر تے بل کلنٹن دا کبوتر۔۔۔۔۔۔۔۔۔۔پارٹ ٹو

لکھاری
عبد الکریم قادری
ماڑے مسیر نیاں جتھے ہور بُوں ساریاں خوبیاں نیں، اِنّاں وچوں ہک خوبی ایہہ وی تھئی جے او بُہوں بڑا گُڈے باز (پتنگ باز) وی اے۔ گُڈے کی اپنی انگلیاں نے اشارے اوپر نچانا، ماڑے مسیر اَپر بس کرنا۔ ماڑا مسیر جدوں گُڈا اڈارنا تہ جوں ای اس ناں گڈا ہوا وچ بلند ہونا، محلے نے سارے جاتک ہک دم اپنے اپنے گڈے لائی کننے کہ ہن اساں نے گڈیاں نی خیر نئی۔
ماڑے مسیر ناں جدوں گڈے بازی وچ کوئی جوڑ نی رئیا تہ اس نواں کم شروع کیتا کہ کوئی کٹیا ہویا گڈا جدھروں لنگھنا ہوسی، ماڑا مسیر کمال مہارت نال اس کی رُونگی کِنسی یعنی اس کٹے ہوئے گڈے نی ڈور نال اپنا گڈا اس طرح پھیرسی کہ اس کٹے ہوئے گڈے نی ڈور وچ پھسی جاسی تہ گڈا لوائی تہ اوہ کٹیا گڈا وی نال لپیٹی آنسی۔ فیر ہک ٹائم ایسا وی آیا جدوں ماڑے مسیر نی گڈے رُونگنے نی مہارت اتنی عروج اپر پہنچی گئی کہ اوہ کٹے ہوئے گڈیاں کی چھوڑی تہ کبوتراں نے پیچھے پئی گیا یعنی اُڈرنا کبوتر اپنے گڈے نال رُونگی آنن لگی پیا۔ بس کوئی کبوتر اس کی اپنی رینج وچ اڈرنا نظر اچھی گچھے، کبوتر نے نال اپنا گڈا اس طرح گھمانا کہ کبوتر نی لت(ٹنگ) یا پَر، اپنی ڈور وچ پھسائی کننا تہ اس کی اپنے گڈے نال تھلے لوائی تہ پکڑی کننا۔ تہ او رُونگے ہوئے کبوتر الگ جال وچ رکھنا تہ فخر نال دسنا کہ ایہہ جیہڑے کبوتر اے ناں! ایہہ سارے میں اپنے گڈے نال رُونگی تہ آندے۔
ایہہ اودوں نی گل ای جدوں پرویز مشرف نی حکومت وچ امریکہ نے صدر بل کلنٹن پاکستان ناں دورہ کیتا سا، تہ سیکیورٹی نی وجہ نال پورا اسلام آباد سِیل ہوئی گیا سا تہ پنڈی نی وی ساری آمد و رفت رکی گئی سی۔
ماڑا مسیر حسب معمول اپنا گڈا پیا وداہنا سا کہ ہک کبوتر نی بدقسمتی کہ ماڑے مسیر نی نظر اس اپر پئی گئی جیہڑا کافی بلندی اپر پرواز کرنا پیا سا، بس فیر ماڑے مسیر اپنا گڈا اس پاسے موڑی کندا تہ اس پھرتی نال اس کی اپنی ڈور نے شکنجے وی پھسائی تہ رُونگی آندا تہ پکڑی تہ اپنے جال وچ ڈکی کیندا۔ کوئی دس منٹ ناں گزرے ہوسن کہ ماڑے مسیر نے موبائل اپر کال آ گئی تہ نمبر وی کوئی ناں نظر اچھے، ماڑے مسیر آخیا اے کیئے جی کال ای جس ناں کوئی نمبر ای نظر نی اشنا پیا، خیر ماڑے مسیر کال چائی کندی۔ اگوں آواز آئی کہ اوئے! تُوں مسیر پیا بولنا ایں؟ ماڑے مسیر آخیا۔ جی! مسیر پیا گل کرنا واں۔ بندے آخیا۔ کال ہولڈ کر، امریکی صدر بل کلنٹن صاحب تاڑے نال گل کرنا چاہنے۔ نال ای آواز آئی۔ یارا! میں بل کلنٹن پیا بولنا واں۔ پہلے ایہہ دس کہ تُوں انسان ایں کہ کوئی خلائی چیز ایں؟ ماڑے مسیر آخیا۔ جی! میں بندا واں جی، تہ دسو میکی کس ماریاں یاد کیتا نے؟ آواز آئی۔ تُوں ایہہ کے کیتا مسیرا۔ اوئے اساں ناں کبوتر پکڑی کندا ای جیہڑا اساں سیکیورٹی ماریوں اڈاریا سا۔ ماڑے مسیر آخیا جی می کی کے پتہ نیں، میں تہ کبوتر رونگنا رہنا واں۔ بل کلنٹن آخیا۔ اوئے جاکتا! تُوکی پتہ کہ توں کے چیز پکڑی کندی؟ اس کبوتر اپر اساں نے کروڑاں ڈالر لگے، اس کبوتر وچ بُہوں ہائی لیول نے کیمرے فکس ہوئے نی، دنیا نے سب توں قیمتی سینسر لگے وے تہ اس کبوتر نی دس مہینے سپیشل ٹریننگ ہوئی وی۔ ماڑی ساری سیکیورٹی ناں دار و مدار اس کبوتر اپر آ۔ اوئے جَنّے نیا پُترا۔ ایہہ کیہ کیتا ای؟ یارا، اس کبوتر کی دنیا نی کوئی ایجنسی نی پکڑی سکی سی، جیہڑے کبوتر چین نی تہ روس نی ایجنسیاں کی کدے پکڑائی نی سی دتی، اوئے تُوں اس کی کس طرح پکڑی کیندا؟ اوہ وی بغیر کسے ہتھیار تُوں؟ تُساں پاکستانی کے چیزاں یو یارا؟
گل سُن ماڑی۔ حالات بُوں خراب اے، ادھا خون ماڑا ویسے ای پاکستان اچھی تہ خشک ہویا سا، باقی توں سکھائی چھوڑیا۔ جیہڑا کبوتر دنیا نی کسے ایجنسی نے ہتھ نی چڑھیا، جیہڑا اج تک کسے ریڈار اپر نی آیا، دنیا نے کسے ملک کی اس نی کوئی خبر نی ہوئی۔ اوئے ایہہ کبوتر ٹرینڈ سا، ایہہ تہ دو کلومیٹر نے اندر کوئی بندہ اُچا ساہ وی کننا تہ اس کی نوٹ کری کننا سا۔ میں حیران اس گلے اپر آں کہ اساں نی ساری ٹیکنالوجی جس اپر انہا پیسہ لگا، اس کی توں ایک گڈے تہ ڈور نال مار چائی دتی۔ دیکھ یارا! میں تاڑے نال آپوں پیا گل کرنا واں حالانکہ ماڑا سیکیورٹی انچارج آخنا سی کہ پندراں منٹ دیو، جس کبوتر پکڑیا او بندہ تہ کبوتر تساں نے سامنے پیش کری چھوڑساں۔ میں آخیا۔ بے غیرتو! ایویں ناں ماریا کرو۔ جس ہک گڈے نال تساں نی ساری سیکیورٹی پکڑی کندی او تساں ناں اوہ حال کرسی کہ تساں نیاں ہڈیاں تک نی ملن لگیاں۔ میکی آپوں گل کرن دیو۔ میں اس نی منت کرساں تہ اوہ کبوتر چھوڑ دیسی ۔ مسیرا! توں اگر امریکہ وچ ہونا ایں ناں تہ اساں نی بوں خوش قسمتی سی، تہ میں تُوکی بُوں انعام تہ میڈل دیاں آر۔ ہُن مہربانی کر، ماڑی درخواست ای کہ مہربانی کری تہ اساں ناں کبوتر چھوڑ دے، میں دِلوں تواڑی منت پیا کرنا واں۔
ماڑے مسیر آخیا۔ دیکھ کلنٹن! تُوں صدر ہوسیں اپنے آستے۔ جے تُوں بدمعاشی کری تہ ماڑے کولوں کبوتر منگیں آر تہ تاڑا پیّو وی اچھی تہ ماڑے کولوں کبوتر نی سا کنی سکنا۔ پر توں گل پیار نال کیتی۔ تہ پیار نے بول اپر ماڑی جان وی حاضر ای۔ جُل موجاں مار تہ ایہہ لے اپنا کبوتر۔
ماڑے مسیر، فون بند کیتا تہ کبوتر ہوا وچ اڈاری چھوڑیا۔

اپنی رائے دا اظہار کرو

ماڑا مسیر تے بل کلنٹن دا کبوتر۔۔۔۔۔۔۔۔۔۔پارٹ ٹو” ایک تبصرہ

تبصرے بند ہیں