427

شاہ حسین دا عرس۔ میلہ چراغاں شروع

لہور, رپورٹ۔ وسیم عظمت
شاہ حسین لہوری دا 431 واں عرس تے میلہ چراغاں اج باعبان پورہ وچ شالامار باغ دی بغل وچ اوہناں دے مزار تے شروع ہو گیا. شہریاں نوں ایہہ میلہ ویکھن دی سہولت دین لئی اج لہور وچ مقامی چھٹی اے. پنجاب دے ایہہ مہان سوجھوان تے شاعر ساہ حسین 1538 وچ لہور وچ تکسالی دروازے دے اندر جمے تے 1599 وچ لہور وچ ہی چلانا کر گئے. اوہ اک دستکار دے گھر جمے سن تے پیو دادے دا ہنر وی سکھیا تے نالے مدرسے وچ اوس زمانے دا علم وی پڑھیا, سکھیا. آکھدے نیں بئی مدرسے وچ دلا بھٹی وی اوہناں دا سنگی سی جیہڑا بعد وچ مغل بادشاہ دا نابر ہو گیا تے اخیر قید کر کے پھاہے لایا گیا. شاہ حسین لہوری ہوراں دی زندگی حیاتی نوں سمجھدیاں تے سمجھاوندیاں لنگھی, اوہناں آپنے وچاراں نوں شاعری وچ بیان کیتا تے پنجاب دی شاعری دی نویکلی فارم “کافی” نوں آپنے وچاراں دے بیان لئی ورتیا. اوہناں دی حیاتی وچہی اوہناں دے وچاراں تے کلام دی مشہوری ہو گئی سی تے عام لہوریئے اوہناں نوں گیان والا بابا من دے سن. اوہناں دا کلام گاوندے سن تے اوہناں دیاں گلاں اتے سوچ وچار کردے سن. شاہ حسین دے چلانا کرن مگروں لوکاں اوہناں دی قبر تے عرس تے میلہ کرنا چھوہ دتا. اوہناں دے قبر تے جا کے لوکین دیوے بال دے سن تے چراغاں کردے سن. ہن وہ شاہ حسین دے چاہون والے میلے دے دناں وچ دربار تے اینی وڈی گنتی وچموم بتیاں بالدے نیں کہ موم بتیاں دا بھانبڑ مچ جاندا اے. رنجیت سنگھ دی پنجاب وچ حکومت آئی تے اوہنے شاہ حسین دے عرس تے میلے دی سرپرستی شروع کیتی, پنجاب اتے انگریز راج دے 90 ورھیاں وچ وی ایس میلے دی سرکاری سرپرستی کیتی جاندی سی تے دربار اتے عرس تے باغ شالامار وچ میلہ لگ دا سی. باغ شالامار وچ میلہ 1958 وچ ڈکٹیٹر ایوب خاں نے بند کروایا. شاہ حسین دی حیاتی تے اوہناں دے وچاراں اتے کئی سوجھواناں لکھیا جیہناں وچوں نجم حسین سید ہوراں دا ناٹک “تخت لہور” اک لیجنڈری آرٹ پیس منیا جاندا اے

اپنی رائے دا اظہار کرو