263

بچے پارلیمنٹ توں دور رہن

لکھاری،وسعت اللہ خان
شکریہ بی بی سی
لنگھےہفتے بلوچستان اسمبلی دی اک رکن ماہ جبین شیران اپنا بال کوچھڑ چک کے آگئیاں۔ کجھ ممبراں اک غیر رکن یعنی بال دی موجودگی تےاعتراض کیتا،فیر قنون دی عمل داری ہوئی تاں اک ماں رکن اسمبلی نوں اپنے بال سنے ایوان توں باہر گھل دتا گیا۔
ماہ جبین نے میڈیا نوں دسیا پئی،اوہ اپنے بال نوں ایس پاروں لے کے آئیاں نیں کہ اوس نوں کدھرے چھڈکے نئیں آسکدی سن، دوجا کم اتے توجہ لئی ضروری سی بال اوہناں دے کول ہوندا۔
اوہنا آس کیتی پئی اسپیکر حکم جاری کرن کہ اسمبلی دی بلڈنگ وچ نکے بالاں دی ویکھ بھال لئی اک ڈے کیئر سینٹر بنایاجاوے، تاں جے کوئی رکن ہووے یا اسمبلی دی ملازم زنانی اوس نوں ایہہ سہولت ہونی چاہیے دی اے، ایس نال اوہ اپنے کم اتے پورا دھیان رکھ سکن گئیاں۔
ماہ جبین دی منگ اتے ہالے تائیں اسپیکر یا وزیرِ اعلی ولوں اجیہا کوئی حکم سامنے نئیں آ سکیا۔
ایہہ معاملہ نری اک اسمبلی دا نئیں سگوں ساری رکن زنانیاں لئی بہوں اہم اے، ایس بارے قنون بناون دی لوڑ اے۔
2003 وچ آسٹریلوی ریاست وکٹوریہ دی رکنِ اسمبلی کرسٹی مارشل جدوں اپنے بال نوں اسمبلی لے کے آئیاں تان اوتھے اوہناں بال نوں ددھ پیان دی کوشش کیتی، تاں سپیکر نے اوس نوں اجلاس چھڈ کے باہر جاون د احکم دتا۔
ایس تے چوکھی بحث مگروں ددھ پین والے بالاں بارے اسمبلی ضابطیاں وچ ترمیم کیتی گئی۔
نیوزی لینڈ دی وزیرِ اعظم جیسنڈا آرڈرن لنگھے ورھے اقوامِ متحدہ دی جنرل اسمبلی سالانہ اجلاس وچ اپنی تن مہینے دی کڑی نیوتی آروہا نوں لے گئیاں۔بطور کئیر ٹیکر نیو دا والد گیفرڈ وی اجلاس وچ خصوصی اجازت نال شریک سی۔ بچی دے داخلے لئی وی اجازت نامہ بنایاگیا سی، اوہدے تے لکھیا سی ’نیو آرڈرن ، فرسٹ بے بی آف نیوزی لینڈ ۔
جنرل اسمبلی صدر سنےاجلاس دے کسے شریک طعنہ نئیں دتا، کہ اک بچے تے کیئرٹیکر نوں کیوں بیٹھن دی اجازت دتی گئی۔’وزیرِ اعظم جیسنڈا ثابت کیتا اک کم کرن والی ماں کیویں چنگے طریقے نال ملک نوں وی چلاسکدی اے۔
ہوسکدااے ساڈی اسمبلیاں وچ ایس لئے ددھ پیندے بال لیان دی اجازت نئین دیندے کدھرے اوہ رون نہ یا اسمبلی کارروائی نوں اتھل پتھل نہ کردین، دوجے پاسے جنا رولا رپا ساڈے ایواناں وچ ہوندا اوہدے مقابلے وچ تن چارمہینے دا بال کیہ شور کرسکدااے۔
میں ذاتی طور تے بالاں نوں اسمبلیاں وچ لیان دامخالف آں،ایس لئی کیوں جے اوہناں نوں وی اوہو زبان تے اشارے سکھادتے جیہڑے وڈے کردے نیں تے فیر کیہ ہووے گا؟
فیر وی پارلیمانی ماواں بالاں نوں چاہون تے ایہہ سہولت دا حق ہونا چاہیدااے۔

اپنی رائے دا اظہار کرو