372

ایہہ سال وی لنگھ گیا

لیکھ ،روشنی
ایس ورھے وی کئی اہم تے گھٹ اہم وقوعے ہوئے، سیاست وچ وڈی تبدیلیاں تے نئیں آئیاں سگوں وڈے سیاسی آگو روگی بن گئے اوہناں نوں جیل ہوئی تے فیر اوہ ضمانتاں اتے رہا وی ہوگئے، کل ملا کے ملک دی سیاست ہسپتالاں تے جیلاں دے اندر باہر گھوم دی رہی۔ لنگھے وزیراعظم نواز شریف پنڈی توں لہور دی کوٹ لکھپت جیل آئے، اوہناں دے پچھے دھی مریم وی گئی، لنگھے صدر آصف علی زرداری نوں گرفتار کرے اڈیالہ جیل گھلیا اوہ وی بیمار ہوکے اسلام آباد دے ہسپتال اپڑگئے۔ تبدیلی سرکار اپنے دعوے تے وعدے دہراندی رہی، لوکیں رجھ مہنگائی دی چکی وچ پسدے رہے، بے روزگاری گھٹن دی تھاں ودھ گئی، ماڑے تے ہمیش تنگ رہے نیں، تگڑے وی چیکاں مارن لگ پئے، سارا سال احتجاجاں وچ لنگھ گیا، کدے تاجراں تے کدے ڈاکٹراں رہی سہی کسر وکیلاں وی اخیر ہلہ بول دتا۔ کجھ احتجاج سیاسی روپ دھار گئے۔ اسمبلی وچ بوہتی قنون سازی نئیں ہوئی سگوں صدارتی محل وچ ڈھیر آرڈیننس جاری کردتے گئے۔ آرمی چیف نوں ہور تن ورھے لئی ملازمت وچ وادھا دینا، وفاقی سرکار دے گلے پھس گیا، اوس نوں اک نوٹیفکیشن کڈھنا اوکھا پے گیا، گل وڈی عدالت وچ گئی جتھے سرکار کولوں معاملہ سانبھیا نہ جاسکیا، اوس نوں نویں قنون سازی دی ہدایت مل گئی، جاندے جاندے چیف جسٹس وی کئی گلاں کردتیاں، جیہدے وچ سابق صدر تے فوجی آمر پرویز مشرف نوں ہوون والی سزا سی، عدالت سزا تے سنائی نالے اک جج لنگھے فوجی جرنیل دی لاش دریکھدے ڈی چوک وچ لیاکے تن دیہاڑے تیک لٹکاون دی آدر دے چھڈیا، اوس اک نوین بحث چھیڑ دتی۔ وفاقی سرکار مدعی توں صفائیاں دیون والے پلڑے ول مڑگئی۔ آرمی چیف دی مدت تے پرویز مشرف دے فیصلے اتے ہالے آوندے ورھے کوئی فیصلہ ہونا باقی رہ گیا اے۔
لوکاں نوں تے ایہو معلوم اے پئی ، پٹرول مہنگا، گیس مہنگی، بجلی مہنگی، سبزیاں مہنگیاں کوئی شے ماڑے بندے دے ہتھ نئیں، اوہ وزیراعظم دے ایس درس اتے بیٹھے نیں کہ گھبرانا نئیں۔ ماڑے تے کدے گھبرائے نئیں، اوہناں نوں ایس دی عادت اے۔
ویکھنا اے کہ نواں سال کجھ لے کے آوندا اے، یاں اوہناں نوں انج ای آس دی مٹھی گولیاں کھوائی جاندیاں رہن گئیاں۔

اپنی رائے دا اظہار کرو