642

گھنگٹ اوھلے نہ لک سجنا ں

لکھاری . زاھد اقبال بٹ
سارے فنکار میک اپ کیٹ سمیت ھمیشااحساس برتری دی وجا توں آپس وچ لڑدے مردے رہن گے کوئی وی فنکار اس گل اتے سانجھ نھیں کرن گے کہ دوجے فنکار نے دنیا نوں کجھ دتا اے اوھ ہمیشا اک دوجے اتے تنقید تے اپنا ساڑھ پھوکدے نظری آون گے۔ فنکار کُدی اک دوجے دے سجن نھیں بن سکدے ایسے طرحاں سیاستدان احساس کمتری دا شکار ھوون پاروں سیاست ول رخ کردے نیں جیکر انسان احساس کمتری دا شکار نہ ھووے اوہ کدی وی سیاست دے اکھاڑے وچ چھال نھیں مارے گا۔ سیاست دا اکھاڑہ اجیھے لوکاں واسطے ھی ای جو احساس کمتری دا شکار ھوندے نیں اوہ دنیا نوں ثابت کرنا چاھندے نیں کہ اوہ کمتر نھیں ۔۔۔ویکھو میرے ولوں میں مشیر بن گیا میں وزیر بن گیا میں وزیرآعظم بن گیا،میں صدر بن گیا۔ مینوں ھن کوئی وی کمتر نھیں کیہ سکدا ،میں کمتر نھیں آں اپنا گلا پھاڑ پھاڑ کے لوکاں نوں سبق یاد کراندا رھندا اے اجیھے احساس کمتری تے انا دے مارے لوکاں لئی سیاست دا اکھاڑہ کھول کرن لئی اپنے ول کھچ دا اے تے تسیں تکیا ھووے گا پالیمنٹ وچ تے سڑکاں اتے ایھناں دیاں شھسواریاں تے لوکاں نوں دھتکارن دیاں سو سو واریاں ، مترو ۔۔۔۔ایھی تے نیں ایھناں دی کم ظرفی دیاں چترکاریاں ۔تیجی گل اس ویلے سب توں وڈی جھڑی بکواس دا چلن اے اوہ نفسیات اے مثال دے طور ” سائیکو اینا لائسز ” اک نویں زبان اے جو چھوٹیاں چھوٹیاں گلاں باتاں لئی اے …جو ھر بندا جاندا تے سمجھدا اے ایہ نفسیات دے مداری اک دو کتاباں پڑہ کے اوکھے اوکھے لفظاں دی ورتوں کر کے لوکاں دے تراہ کڈھدے رھندے نیں تے اپنے رٹے اٹھ اکھراں دا رعب جھاڑدے رھندے نیں ۔ ” ایڈی پس کمپلیکس ” اک نکی جئی گل اے کہ ھر منڈا اپنی ماں نال پریت کریندا اے ۔ ایہ نفسیات پڑھن والا بندہ اپنی دوکانداری تے خود نوں عالم فاضل ظاہر کرن لئی تے دھکے زوری متاثر کرن لئی جان بجھ کے ایہ آکھے گا کہ ایہ منڈا ایڈی پس کمپلیکس دا شکار اے تاں جے سنن والا ھکا بکا ھو کے ایس بماری دے کھوج وچ ڈب جاوے تے سائیکا لو جسٹ دے ایس رٹے ھو ئے لفظ دی پوجا پاٹ تے اوھدی ذھانت دا گیت گائیوں بنا نہ رہ سکے ۔ سائیکا لو جسٹ دی ایہ اٹکل لوکاں نوں داء لاون لئی ورتی جاندی اوھدے ایہ رٹے ھوئے آٹھ لفظ سائیکا لو جسٹ دی ساری حیاتی کمائی کرن دا ذریعا نیں ۔ا یھ سارے مداری presentation دے بھانے اپنی نالائقی چھپاندے نیں جیکر presentation دیندیاں بجلی ٹر جاوے تے ضدی کھوتے وانگوں اوسے تھاں اتے رک جاندے نیں تے زبان تے دماغ کم کرناں چھڈ دیندا اے جویں چلدی گڈی وچوں پٹرول مک جاوے۔تسیں اجیھے سائیکا لو جسٹاں دی زھانت دا اندازہ اسانی نال کر سکدے اوہ کہ اوہ کویں لوکاں نوں الو بناندے نیں. اخیر وچ اپنیاں وی کجھ گلاں کر لئے ساڈے آلے دوالے کجھ لمے چھوٹے تے کجھ سوھنے کوجھے ،کجھ کالے چٹے، زھین تے طاقتور، کوئی تھاڈے توں ودہ کامیاب ،کوئی کاریگر تے نکھند، کوئی تھاڈے توں ودہ مشھور ۔۔۔۔۔تسیں لکھاں نال متکا تے ساریاں نال موازناں کویں کر سکدے اوہ پر کجھ لوکاں دے چاء ای پورے نھیں ھوندے جد تک کوئی دوجا تعریف نہ کرے اوھناں دی روٹی ھضم نھیں ھوندی بلکے نیند ای نھیں آوندی ۔۔۔سوچ دے ایس پاگل پن نوں احساس کمتری ھی آکھاں گے تے اجیھے لوکیں اپنے توں گھٹ کماون والیاں اتے رعب جھاڑدے رھندے نیں تے سچی گل اے اپنے توں گھٹ درجے دے لوکاں نال میل کر کے خوش وی ھوندے نیں کیونجے اس طرحاں انا دا لگیا چسکا و ی پورا ھوندا رھندا اے تے جے ایہ لوک کسے اتے احسان کر دیون تے اوھدی مٹی ایھنی پلیت کر دے نیں تے مجبور کریندے نیں کہ کالے رنگ دے مارکر نال اپنے متھے اتے وی میرا ناں لکھ ھن تسیں آپوں فیصلہ کرو اجیھے لوکاں نوں کیھ آکھئے،ووٹ کرن لئی 12 وجے تک لائناں لھلیاں نیں …..تے کجھ انسان حیاتی دے چکراں دے پھیر تے اوھدے نتیجیاں توں جانوں ھوندے نیں اک دوجے نوں کھودناں ،ادھیڑناں ، توں تھلے تے میں اتے ، دوجیاں دے مونھا وچوں اپنیاں تعریفاں لبھنیاں ، علمی موازنےکرنا چھڈ چکے ھوندے نیں ۔ اوھناں وچوں ایہ ھی واج سنیندی اے ۔۔۔نہ توں بر تر اے تے نہ ھی کمتر۔۔۔۔۔۔۔۔۔۔۔

اپنی رائے دا اظہار کرو

گھنگٹ اوھلے نہ لک سجنا ں” ایک تبصرہ

  1. جی بہتر ۔۔۔۔2 ۔4 گھنٹے جیکر ھور لائیے تے لکھت ھور چنگی ھو سکدی اے

تبصرے بند ہیں