450

قومی ترقیاتی کونسل وچ فوج دی شرکت کیوں؟

وفاقی کابینہ دے اجلاس وچ ملک دی معاشی صورتحال نوں ویکھدیاں قومی ترقیاتی کونسل بناون دا فیصلہ کیتا گیا تے بڑے اچنبے دی گل ویکھی گئی کہ فوج دے سربراہ جنرل قمر جاوید باجوہ نوں وی ایہدے وچ شامل کرلیا گیا۔
بی بی سی دی رپورٹ مطابق کابینہ ڈویژن ولوں اعلامیہ وی جاری کیتا گیا۔ قومی سلامتی کونسل مگروں ایہہ دوجا ادارہ اے جیہدے وچ آرمی چیف نوں شریک کیتا گیا اے۔ لنگھے کجھ دناں توں ایس بارے میڈیا وچ بحث چل رہی سی۔ اعلامیے مطابق کونسل بناون دا مقصد خطے وچ تعاون متعلق فیصلے لینا تے ایس توں اڈ پاکستان دی روز دیہاڑ وگڑدی معیشت نوں بہتر بناون لئی کم کرنا اے۔ ایس 12 رکنی کونسل دا آگوائی وزیرِ اعظم عمران خان کرن گے، جیہدے وچ چاراں صوبیاں دے وزیراعلیِ تجارت، خزانہ، خارجہ، منصوبہ بندی دے وزیر وی شامل ہوون گے۔ کونسل دی تشکیل بارے اہم گل ایہہ اے پئی ایس وچ ملک دے چیف آف آرمی سٹاف جنرل قمر جاوید باجوہ وی شامل نیں، جیہدے اتے ہالے تائیں اپوزیشن ولوں کوئی خاص ردِّعمل ویکھن نوں نئیں آیا۔

کونسل بناوں بارے کئی سوال سامنے آرہے نیں ہالے تائیں میڈیا وی ایس اتے کوئی گل نئیں کیتی اے۔
نوٹیفیکیشن مطابق ایس کونسل دا مقصد علاقائی سطح اتے فیصلے، اقتصادی ترقی، معاشی پدھر اتے پہلاں توں جاری تے اگے توں بنن والے پراجیکٹ دی منصوبہ بندی تے خطے وچ دوجے ملکاں وچکار تعاون لئی ہدایتاں دینا ہووے گا۔ ایس دے نال ای ترقیاتی کماں بارے ٹیچے متھناں وی ایس دی ذمے واری وچ شامل ہووے گا۔
کونسل وچ فوج دا کیہ کم؟
تبصرے کرن والے کہندے نیں ایس کونسل راہیں فوج نوں پکے طریقے نال پالیسی بناون دے عمل دا حصہ بنایا گیا اے۔ جیہدے نال اوس دی حیثیت مزید مضبوط ہووے گی۔ قومی سلامتی کونسل مگروں ایہہ دوجا ادارہ اے جدے وچ فوج دے سربراہ نوں شریک کیتا گیا اے۔
فائننشل ٹائمز دے اسلام آباد وچ نمائندے فرحان بخاری نے بی بی سی نوں دسیا کہ ایہہ کھل ڈل کے فوج نوں وفاقی تے خارجی فیصلیاں وچ شریک کرن دا اک مکمل تے پکا طریقہ اے۔’
اوہناں آکھیا کہ پہلاں وی کئی فیصلیاں وچ صاف وکھائی دیندا سی کہ ایہہ فیصلے کون کررہیا اے۔ کونسل وچ فوج نوں شریک کرن دے فیصلے نال اوہ شک شبہے دور ہوجاون گے۔ ‘
کابینہ اجلاس وچ نوٹیفیکیشن جاری ہون دا کارن ایس کونسل دی آئینی حیثیت نوں کھول دینا تے ایس نوں مضبوط کرنا اے تاں جے اگے توں فیصلے لین وچ کوئی ہٹک نہ آئے تے ایہہ سنیہا وی دینا سی کہ فوج تے سویلین سرکار اک پھٹے اتے وے۔
اس حوالے سابق وزیر داخلہ تے منصوبہ بندی احسن اقبال نے اک ٹویٹ وچ لکھیا کہ کیہ قومی ترقیاتی کونسل قومی معاشی کونسل دی تھاں لے گی جیہڑا کہ اک آئینی فورم اے؟ کیہ فوج پکے طریقے نال معاشی انتظام سانبھن دا کریڈٹ یا الزام آپ اتے لے لئے گی؟ اک شہری دے ناطے میرے کجھ خدشات نیں انج لگدا رہیا اے کہ سرکار فوج نوں چنبھیلیاں وچ گھسیٹ رہی اے۔

اپنی رائے دا اظہار کرو