451

بھارت دے ساحلی علاقیاں چ سمندری طوفان دا خطرہ

لہور (سجن رپورٹ) بھارت دے چڑھدے ساحلی علاقیاں وچ سمندری طوفان “فانی” دے خطرے پاروں ممکنہ نقصان توں بچن لئی ریاست اوڑیسہ دے 11 ضلعیاں وچ 8 لکھ توں چوکھے شہریاں نے گھر چھڈ کے 880 توں ودھ عارضی پناہ گاہواں وچ پناہ لے لئی اے۔ اوڑیسہ دے تخت شہر بونیشور اِچ وزیر اعلی نوین پٹنائک تباہی توں بچن لئی تیاریاں وچ رُجھے نیں جد کہ نویں دہلی وچ وزیراعظم نریندر مودی ہوری تیاریاں دی نگرانی کر ریے نیں۔ ڈاڈھے خطرے والے علاقیاں وچ لوکاں نوں گھر چھڈوا کے محفوظ علاقیاں وَل گھلن لئی ریاستی سرکار نے وڈی پَدھر تے آگاہی مہم چلائی اے۔ ہنگامی مدد لئی محکمہ صحت دیاں ٹیماں نوں اچیچی تیاری کروائی گئی اے جد کہ ہسپتالاں وچ وی سربندھ کیتے جا رہے نیں۔ اوڑیسہ سرکار نے شہریاں دی مدد لئی 936 میڈیکل ٹیماں، ایک ہزار عاضی پناہ گاہواں جد کہ ہنگامی امداد لئی 568 ٹیماں بنائیاں نیں۔ صاف پانی دِیاں 32 لکھ بوتلاں، جانوراں دی خوراک دے تھیلے تے بجلی بحال کرن والے درجناں جتھے بنائے گئے نیں۔

اپنی رائے دا اظہار کرو